Елизавета II нинг гаражи: Буюк Британия қироличаси қандай машиналарни хуш кўради?

Дунёнинг нуфузли аёлларидан бири Елизавета II Буюк Британиянинг энг кекса монархи мақомини сақлашда давом этмоқда. У 94 ёшини қарши олди, тахтни эса 68 йилдан буён эгаллаб, рекордни янгилади.

Ўтган йиллар мобайнида автоуловларни бошқариш Буюк Британия қироличасининг энг севимли машғулотига айланган. Қироллик гаражида расмий ҳамда норасмий тадбирлар учун ўнлаб машиналар мавжуд.

Иккинчи жаҳон уруши вақтида 18 ёшли малика Елизавета II тез ёрдам машинаси ҳайдовчиси сифатида ўқитилган. Ўша йилларда хоним Austin K2/Y русумли юк машинасини бошқарган ва шундан кейин катта машиналарга меҳр қўйган.

Rolls-Royce Phantom IV

1950 йилда малика турмуш ўртоғи − Эдинбург герсоги билан биргаликда Rolls-Royce Phantom IV ишлаб чиқаришни буюрган. Ушбу машина ҳанузгача Британия гаражида сақланади, шунингдек, у жуда яхши ҳолатда. Қироллик анъаналарига кўра, муҳим тадбирларда оила учун бу каби рамзий машиналардан фойдаланиш одат тусига кирган. Шаҳзода Уильям ҳамда Гаррининг никоҳ тўйида ушбу машина ҳам келтирилган. Шуниси эътиборга лойиқки, 18 та Rolls-Royce Phantom IV ишлаб чиқарилган ва уларнинг барчаси монархлар ҳамда давлат раҳбарлари хизматида бўлган.

Rolls-Royce Phantom VI

1977 йилда Буюк Британия автомобиль ишлаб чиқарувчилари Елизавета II ҳукмронлигининг 25 йиллигига Rolls-Royce Phantom VI ни тақдим этган. Автомобиль кўпинча расмий ташрифлар вақтида ишлатилади. Аммо малика рулга ўтирмайди.

Land Rover

Урушдан бир неча йил ўтиб алюминийдан ясалган Land Rover қироличанинг гаражидан жой олган. Маликага машина жуда ёқади, ҳаттоки уни шахсий мақсадлари йўлида бошқаради.

Land Rover Defender

Қироллик оиласи ҳозирда ҳам Land Rover транспорт воситаларини бошқаришда давом этмоқда. Таъкидланишича, Елизавета II ушбу машинани жуда яхши кўради, сабаби машина унга ҳарбий хизматни эслатади.

Land Rover Range Rover

Шунингдек, қироличанинг гаражидан Land Rover Range Rover ҳам жой олган. Ушбу машина норасмий саёҳатлар учун бошқарилади.

Land Rover Landaulet

Бир неча йил олдин қиролича учун махсус Land Rover Landaulet машинаси ишлаб чиқарилган. Автомобильнинг орқа ўриндиқлари томи очилади. Автомобиль салонида ташриф чоғида тик туриш учун тутқичли махсус платформа яратилган.

Vauxhall Cresta Fiary Estate Rover P5B

Қиролича ёшлигида ҳам оддий ва кўзга ташланмайдиган автомобилларни хуш кўрган. Ушбу машина ҳам ўртача даражадаги автомобиль қидираётган харидорлар учун ишлаб чиқарилган.

Jaguar

Буюк Британия қироличасининг тез-тез Jaguar ҳайдаганини кўришган. Ушбу машина билан қизиқарли воқеа ҳам рўй берган. Махсус хизмат туфайли Виндзор боғи орқали кетаётган қиролича сайрга чиққан ёш оилани безовта қилмаслик учун майсазор устидан юришга қарор қилган. Ушбу ҳодисанинг сурати бутун дунёга тарқалган.

Bentley State Limousine

Расмий саёҳатлар учун қиролича фойдаланадиган автомобиль. Машина қироличага ҳукмронликнинг 50 йиллиги шарафига совға қилинган. Автомобильда ўқ ўтказмайдиган ойналар мавжуд бўлиб, унинг ички қисми газ ҳужумига қарши тура олади. Авваллари Англия қироличасининг машиналари бу каби ҳимояга эга эмас эди. Аммо XXI асрда террористик ҳужумларнинг кўпайиши билан қоидалар қайта белгиланди.

Бугунги кунга қадар Елизавета II тантанали саёҳатлари учун ушбу машинани танлайди.

Bentley Bentayga

Ҳозирда қирол гаражининг жавоҳирларидан бири. Ушбу машинани яратиш учун бир неча йил ва миллиардлаб доллар сарфланган. У тўқ яшил рангда бўлгани учун расмий тадбирларда ундан фойдаланилмайди. Қиролича автомобилни Шотландия ерларига саёҳат қилишда бошқаради.

Бир неча йил олдин қироличанинг эри ўзининг севимли Land Rover Freelander’да автоҳалокатга учраган эди. Яхшики, жароҳат унчалик жиддий бўлмаган. Хавфсизлик ходимлари ҳодисанинг такрорланишидан қўрқиб, монархларга фақат ҳайдовчи билан саёҳат қилишга рухсат берилган протоколдаги ўзгаришларни талаб қила бошладилар. Аммо барибир қиролича машиналарга бўлган муҳаббатидан бутунлай воз кеча олмади. У 94 ёшида ҳам автомобиль ҳайдашни давом эттирмоқда.