«ВКонтакте» ижтимоий тармоғида Санкт-Петербургдаги Василевский ороли ҳудудида иккита «Шерп» йўлтанламаси сузаётгани тасвирланган видеоролик тарқалди. Машина ҳайдовчилари эндиликда 5 минг рублгача (67 доллар) жаримага тортилиши мумкин, деб хабар беради Motor.
Эълон қилинган видеода иккита «Шерп» Смоленка дарёсининг очиқ сувларидаги музлар орасида сузиб юрганини кўриш мумкин. Шундан сўнг, йўлтанламас ҳайдовчиларидан бири қаттиқ юзага чиқишга уринган, бироқ машина энди муз устига чиққанида муз ёрилиб кетган.
Ҳайдовчилар нима сабабдан юпқа муз устига чиқишга қарор қилгани номаълум. Эҳтимол, бу реклама акцияси ёки машина эгалари шунчаки йўлтанламасларини табиий шароитда синаб кўришни хоҳлаган бўлиши мумкин.
Санкт-Петербург Қонун устуворлиги, қонун ижроси ва хавфсизлик қўмитаси матбуот хизматининг маълум қилишича, вилоятда 15 апрелга қадар муз устида автомобилда ҳаракатланиш тақиқланган. Агар қоидабузарлар шахси аниқланса, уларнинг ҳар бири 5 минг рубль миқдорида жаримага тортилади.
Аввалроқ америкалик рэпер Канье Уэст қўшиқчи Крис Браунга Россияда ишлаб чиқарилган «Шерп» йўлтанламасини совға қилгани тўғрисида хабар берилганди.
Изоҳ (0)