Италияда Fiat Doblo автомобилини олиб қочган номаълум шахслар ижтимоий тармоқлар орқали машина эгасининг оғир касаллигидан хабар топиб, уни қайтариб берди, деб ёзади Motor. Машина ўғрилари ҳатто кечирим сўраган мактубни ҳам қолдирган.
Fiat Doblo минивени 13 январь куни Италия жанубидаги Бари шаҳрида жойлашган касалхона тураргоҳидан ўғирлаб кетилган. Склероздан азият чекувчи автомобиль эгасининг қизи Рита Дамиани полицияга мурожаат қилиш билан чекланмай, Facebook’да пост қолдирган.
Унда қиз ўғирланган машина онасининг ҳаракатланиши учун ягона транспорт воситаси бўлганини таъкидлаган. Имконияти чекланган инсонлар фойдаланиши учун махсус жиҳозланган Doblo «пандус» ва ногиронлар аравачасига эга бўлган.
Қизнинг постини салкам минг киши улашган ва натижада у ўғриларга қадар етиб борган. Йўқолган автомобиль бир неча кундан сўнг топилган: маҳаллий фуқаролардан бирининг уйи қаршисида турган машинани кўриб қолиб, карабинерларга мурожаат қилган. Машина очилгач, ичидан мактуб топилган.
«Бизнинг ҳам юрагимиз бор, кечиринг бизни, касаллигингиздан бехабар эдик», — дейилади мактубда.
Дамиани оиласи Doblo билан қайта топишганидан сўнг, барчага миннатдорчилик билдириб, маҳаллий хайрия ташкилотига топшириш учун ногиронларга мўлжалланган бошқа автомобилни харид қилишга хайрия эълон қилган.
Аввалроқ АҚШда машинани миниб қочган ўғри унда ёш бола борлигини билиб қолиб, ортига қайтгани ва унинг онасини уришиб бергани тўғрисида хабар берилганди.
Изоҳ (0)