Moskvadagi “Lujniki” sport kompleksi arenasida ikki nafar yo‘lovchiga mo‘ljallangan mahalliy havo taksilarini sinovdan o‘tkazish boshlandi, deb xabar beradi Motor. “Xover” startapi tomonidan ishlangan uchuvchisiz boshqariladigan taksi 150 metr balandlikka 300 kilogrammgacha yukni ko‘tarishga qodir.
Hozircha aerotaksi ochiq konstruksiya va payvandlangan metall trubalardan biorat. O‘lchami jihatidan u oddiy avtomobil kabi: uzunligi 5 metr, eni — 1,6 metr. Bu apparatning standart avtoturargohdan ko‘tarilishi va qo‘nishiga imkon beradi. U qadar katta bo‘lmagan to‘rtta g‘ildiragi yordamida aerotaksi turargohda manyovrlarni amalga oshirishi yoki garajga kirishi mumkin.
Yo‘lovchi dronining harakatlanishi mumkin bo‘lgan maksimal tezlik soatiga 200 kilometrni tashkil etadi, 300 kilogrammgacha yuk ko‘tara oladi, bir marta quvvatlanish orqali esa 100 kilometr masofa bosishga qodir. U, shahar sharoitida maxsus foydalanish uchun, past shovqin chiqaruvchi elektrodvigatel bilan jihozlangan.
Muhandislar “Lujniki”da uchar prototipning barcha tizimlarining ishini sinovdan o‘tkazmoqda: parvozga javobgar parraklari, gorizontal parvoz va qo‘nish, parashyutning ishlashi va avtonom tizim. Apparat sun’iy intellektga ega bo‘lib, uning o‘zi marshrutlarni tuzishi, parvoz xavfsizligini nazorat qilishi va dronning barcha ko‘rsatkichlarini qayd etib borishi mumkin.
Aerotaksi ustida 2018-yildan buyon izlanish olib borilmoqda. Ixtirochilarning sinovlardan keyingi rejasi hozircha noma’lum.
Eslatib o‘tamiz, 2020-yilning yozida Moskvada haydovchisiz boshqariladigan avtomobil avariyaga uchragan edi.
Izoh (0)