ЖССТ: Коронавирусдан бир ҳафтада дунё бўйлаб 94 минг киши вафот этиб, антирекорд ўрнатилди

Жаҳон соғлиқни сақлаш ташкилоти (ЖССТ) 11—17 январь кунлари  COVID-19 инфекцияси оқибатида дунё бўйлаб 93,9 (+9%) мингта ўлим ҳолатини қайд этди. Бу пандемия бошидан буён кузатилган рекорд кўрсаткичдир, деб ёзмоқда «Коммерсантъ».

Охирги марта энг юқори ўлим кўрсаткичи 86,4 минг нафарни ташкил қилганди. Бутун дунёда коронавирус қурбонлари сони 2 миллиондан ошди.

Америкада — 43,8 минг, Европада — 37,7 минг, Африкада — 5 минг, Жануби-Шарқий Осиёда — 3,4 минг киши мазкур касаллик оқибатида вафот этган.

Ўлим даражасининг ўсиши барча минтақаларда кузатилган. Африка, Шарқий Ўртаер денгизи ва Ғарбий Тинч океани ҳудудларида касалланиш ҳолати ошган.

11–17 январь кунлари 4,7 миллион кишида коронавирус инфекцияси аниқланди. Бу пандемия бошидан бери қайд этилган иккинчи ўриндаги энг юқори кўрсаткичдир. Бундан олдинги бир ҳафта мобайнида 5 миллион кишида касаллик қайд этилиб, вирусга чалиниш бўйича рекорд янгиланганди.

Аввалроқ бутун дунёда COVID-19 билан касалланганлар сони 95 миллион кишидан ошгани, АҚШда эса инфекция юқтирганлар 24 миллион 62 минг нафарга етгани хабар берилганди.

Эслатиб ўтамиз, ЖССТ 2021 йилда COVID-19’га нисбатан жамоавий иммунитет пайдо бўлмаслигини маълум қилган.