BAIC концернига тегишли Arcfox маркаси ўзининг флагман модели — ўрта ўлчамли αS седанни тақдим этди, деб хабар беради Motor. Хитой бренди томонидан яратилган Tesla «қотили» иккита электромотор ва уч турдаги батареяга эга бўлади, уларнинг энг каттаси ёрдамида бир марта қувватланиш орқали 708 километр йўлни босиш мумкин.
Arcfox флагмани ўлчами жиҳатида Hyundai Sonata’га ўхшайди: узунлиги 4930, эни — 1940, баландлиги — 1599, ғилдираклар базаси эса 2915 миллиметрга тенг.
Машина ташқи кўриниши жиҳатидан Tesla’ни ёдга солувчи оптикага, эмблемага келиб уланган икки чизиқли капот ва трапециясимон сохта радиатор панжарасига эга. Шунингдек, αS’да «яширинувчи» эшик тутқичлари, бир-бири билан туташган орқа фаралар ва юкхона қопқоғида кичик спойлер мавжуд..
Машина салони тўқ кул ранг ва сарғиш чарм билан қопланган. Седан «ақлли» α-OS тизими билан жиҳозланган бўлиб, у учта экранга уланиш ва юзни таниш функциясига ҳам эга.
Arcfox αS моно ва тўлиқ узатмали вариантларда тақдим этилади. Биринчи ҳолатда 218 от кучига (360 Нм) эга электромотор олд ўққа ўрнатилади, иккинчисида эса седан ҳар бир ўқида алоҳида моторга эга бўлади. Бунда электромотор қуввати 435 от кучини тақдим этишга қодир.
Бундан ташқари, моделнинг учта батареяли вариант ҳам тақдим этилади. Уларнинг сиғими тўғрисида маълумот берилмаган, бироқ NEDC цикли бўйича қанча масофа боса олиши маълум: танланган вариантга кўра, седан 525, 603 ёки 708 километр йўл боса олади. Таққослаш учун Tesla Model S Long Range Plus бир марта қувватланиш орқали 647 километр йўл босишга қодир.
Маълумотларга кўра, Arcfox αS 2021 йил бошидан сотувга чиқиши мумкин.
Изоҳ (0)