Жо Байденнинг инаугурацияси қандай ўтказилади? Унда АҚШ тарихида биринчи марта ҳарбийлар томошабинлардан кўпроқ бўлади

АҚШнинг 46-президенти Жо Байден ва 49-вице-президенти Камала Харриснинг инаугурацияси Вашингтонда 20 январь, чоршанба куни тушга яқин (Тошкент вақти билан соат 22:00 атрофида) бошланади, деб ёзади Meduza.

Коронавирус ва оммавий тартибсизликлар эҳтимоли туфайли анъанавий маросимга кўплаб ўзгартиришлар киритилди. Маросим қатнашчилари сони қатъиян чекланган: Конгресснинг ҳар бир аъзоси (538 киши) ўзи билан бир киши олиб келиши мумкин.

Одатдагидек, инаугурацияга аввалги президентлар — Билл Клинтон, кичик Жорж Буш ва Барак Обама ташриф буюради. Жимми Картер (кексалиги сабабли) ва Дональд Трамп (шунчаки истамаганлиги учун) келмайди.

Ўраб олинадиган ҳудуд ичкарисига кўпи билан жами уч минг киши киритилади — бу Франклин Рузвельтнинг тўртинчи муддатидан буён кузатилган энг ихчам инаугурация маросими бўлади. Одатда Линколн ёдгорлигидан Капитолийгача бўлган Миллий хиёбонда тўпланадиган оддий томошабинлар ўрнига 200 мингта АҚШ байроғи ўрнатилди — улар рамзий маънода маросимга келмайдиган ташрифчиларни англатади ва коронавирус оқибатида вафот этганларни хотирлайди.

Хавфсизлик чоралари мислсиз: Вашингтонга 25 мингдан ортиқ Миллий гвардия жангчиси жойлаштирилган, марказий туманлар тўсилган, у ерларда метро станциялари ишламаяпти. Қасамёд қабул қилиш маросими 1981 йилдан буён анъанага айланган тарзда Капитолийнинг ғарбий қанотида бўлиб ўтади, сўнг парад президент ва вице-президентни Пенсильвания-авеню орқали Оқ уйдаги қароргоҳларига кузатиб қўяди.

Маросимда АҚШ мадҳиясини Леди Гага куйлайди, ундан кейин Женнифер Лопес қўшиқ айтади. Байрам концерти виртуал форматда бўлиб ўтади.

Маълумот учун: АҚШ президентлари сони вице-президентлар сонига тенг эмас, чунки президентнинг бутун карьераси давомида бир нечта ўнг қўллари бўлиши мумкин. Масалан, Ричард Никсон даврида икки нафар, Франклин Рузвельт даврида эса уч нафар вице-президент бўлган.