Дональд Трамп хайрлашув нутқини эълон қилди (видео)

Ваколатлари 20 январь куни тугайдиган АҚШнинг амалдаги президенти Дональд Трамп халққа хайрлашув видеомурожаатини эълон қилди, деб ёзади Meduza.

«Шу ҳафта биз янги маъмуриятнинг инаугурациясини ўтказамиз ва мен унга Америка хавфсизлигини ва гуллаб-яшнашини таъминлашда муваффақиятлар тилаб, дуо қиламан», — дейилади мурожаатда.

«Мен шафқатсиз курашлар, энг қийин жанглар, энг қийин қарорларни ўз зиммамга олдим — чунки айнан шунинг учун мени сайлагансиз. Бизнинг кун тартибимиз ўнглар ва сўллар ҳақида эмас, республикачилар ва демократлар ҳақида ҳам эмас, балки халқ фаровонлиги ҳақида эди», — деди у.

Трамп, президент сайловида унинг тарафдорлари 6 январь куни Капитолига шиддатли ҳужум уюштирган кундагина мағлуб бўлганини тан олди. «Барча америкаликлар Капитолийга ҳужумдан даҳшатга тушган эди. Сиёсий зўравонлик — бу биз америкаликлар улуғлайдиган ҳамма нарсага ҳужум. Бунга тоқат қилиш керак эмас», — деди лавозимидан кетаётган президент.

Трампнинг қўшимча қилишича, у АҚШнинг бошқа мамлакатлар билан иттифоқларини қайта тиклаган ва «илгари ҳеч кузатилмаган даражада» Хитойга қарши турган. Унинг таъкидлашича, ўз президентлиги даврида бирорта ҳам уруш бошламаганлигидан фахрланади. Трамп ўзи бошлаган сиёсий ҳаракат «ҳали энди бошланаётгани»ни қўшиб қўйди.

Трампнинг АҚШ президенти лавозимидаги ваколатлари 2021 йил 20 январда тугайди. У шу куни Вашингтонда бўлиб ўтадиган АҚШнинг сайланган президенти Жо Байденнинг инаугурациясида қатнашишдан бош тортди.