Қирғизистон Pfizer компаниясининг коронавирусга қарши вакцинасидан техник сабабларга кўра воз кечиш ниятида. Бу ҳақда республика соғлиқни сақлаш вазири Алимкадир Бейшеналиев маълум қилди, деб ёзади «ТАСС».
«Бизга Американинг Pfizer вакцинаси таклиф этилди, у 70 даража совуқ ҳароратда сақланиши керак. Бизда бундай совитгичлар йўқ, уларнинг ҳар бири 4 минг доллар туради. Бюджетда бундай пулларимиз йўқ, шунинг учун биз рад этишга мажбурмиз», — деди у.
Вазирнинг маълумотларига кўра, Pfizer вакцинасини сақлаш учун республика 2 миллион долларлик ускуналарни сотиб олиши керак бўларди. Бейшеналиевнинг айтишича, Қирғизистон COVAX дастури доирасида Pfizer компанияси томонидан ишлаб чиқарилган 1 миллион дозадан ортиқ вакцинани бепул қўлга киритиши керак эди. Тез орада Бишкек мақбулроқ сақлаш шароитларини талаб қилувчи коронавирусга қарши вакцина учун яна битта талабнома беришни режалаштирмоқда.
Шунингдек, вазирнинг таъкидлашича, республика Россия билан «Спутник V» вакцинасини етказиш бўйича музокараларни давом эттирмоқда, у эса 2—18 даража совуққача ҳароратда сақланиши мумкин, бунинг учун Қирғизистон зарур ускуналарга эга. Бейшеналиев вақт ўтиши билан Қирғизистонда коронавирусга қарши вакциналардан бири ишлаб чиқарила бошлашини истисно қилмади, чунки «уни ишлаб чиқариш учун материал қиммат эмас».
Пандемия бошидан буён 6,5 миллион аҳолига эга Қирғизистонда 82 мингдан ортиқ одам коронавирусга чалинди (аҳолининг 1,3 фоизи). Уларнинг қарийб 80 минг нафари соғайди, 1390 нафари вафот этди. Мамлакатда 2020 йилнинг мартида эълон қилинган фавқулодда вазият режими амал қилишда давом этмоқда.
Изоҳ (0)