Германия аҳолисига респиратор тақиб юриш мажбурий қилиниши кутилмоқда

Германия ҳукумати FFP2 синфидаги профессионал респиратор ниқобларини мажбурий тақишни жорий этишни режалаштирмоқда. Бу ҳақда Bild газетасига таяниб, «РБК» хабар берди.

Қайд этилишича, айни пайтда Германиянинг йирик федерал штати Бавария аҳолисига мажбурий равишда респиратор тақиб юриш жорий қилинган. Респираторларни жамоат транспортида ва дўконларда тақиб юриш мажбурий этиб белгиланган.

Хабарда айтилишича, 19 январь куни Германия канцлери Ангела Меркель мамлакатнинг барча 16 та федерал штати раҳбарлари билан учрашган. Учрашувда мамлакатнинг барча аҳолисини FFP2 респираторларидан мажбурий фойдаланиш тўғрисидаги таклиф муҳокама қилинган. Нашр ушбу чекловга оид таклиф маъқулланиш эҳтимоли борлигини билдирган. Учрашувда, шунингдек, мактабларни ёпиш, масофавий талабларни узайтириш масаласи ҳам кўриб чиқилган.

FFP2 респираторларини тақиш талаби Баварияда 18 январдан бери амал қилмоқда. Ҳукуматнинг ушбу қарори респираторларнинг қимматлиги туфайли ҳар хил қабул қилинди. Уларнинг чакана нархи бир донаси учун икки евродан беш еврогача бўлиб, саккиз соат ишлатилгандан сўнг уни алмаштириш керак.

Spiegel газетаси билан суҳбатлашган вирусологлар респиратор яхшироқ ҳимоя воситаси эканлигини билдирган. Аммо ҳукумат мажбурий тақишни жорий қилган тақдирда аҳолини респираторлар билан бепул таъминлаши кераклигини таъкидлаган. «Яшиллар» партияси янги қоида ҳеч бўлмаганда уни сотиб олишга қодир бўлмаганлар учун бепул FFP2 ниқобларини таклиф қиладиган дастур билан мустаҳкамланиши кераклигини таъкидлаган.

16 декабрдан бошлаб Германияда қатъий карантин чоралари амал қилмоқда. Мамлакатда озиқ-овқат, уй-рўзғор буюмлари ва ҳаётий муҳим маҳсулотлар сотиладиган айрим бошқа дўконлардан ташқари қолган барча савдо шохобчалари ёпилган. Шунингдек, сартарошхона, музей, театр, гўзаллик салонлари ҳам ёпилган. Мактаб ўқувчилари масофадан туриб ўқимоқда. Берлин ва Бранденбургда жамоат транспортида ва дўконларда ҳимоя воситаларини тақиш мажбурий. Аммо ҳозирда ҳимоя тоифасига талаблар йўқ.

25 январдан бошлаб жамоат жойларида респиратор тақиш талаби ҳам Австрияда кучга киради. Канцлер Себастьян Курц бу қарорни 17 январда эълон қилди. Мамлакат ҳукумати кам даромадли фуқароларга бепул ниқоб олиш ҳуқуқини кафолатлашни ваъда берган.

Роберт Кох институти маълумотларига кўра, Германияда пандемия бошлангандан бери 2 миллиондан ортиқ COVID-19 ҳолати қайд этилган, 47,7 минг киши вафот этган. Австрияда  эса мамлакат Соғлиқни сақлаш вазирлигининг маълумотларига кўра, 394,9 минг киши касаллангани аниқланган, 7,1 минг киши вафот этган.