Qirg‘iziston sobiq bosh vazirlari Muhammadkaliy Abulg‘oziyev va Kubatbek Bo‘ronov pandemiya chog‘ida odamlarning o‘limiga olib kelgan xatti-harakatlari uchun javobgarlikka tortilishi kerak. Bu haqda Iqtisodiy jinoyatlarga qarshi kurash davlat xizmati rahbari Siymik Japikeyev ma’lum qildi, deb yozadi “Interfaks”.

Foto: “RIA Novosti”

“Kimdir javob berishi kerak, mingdan ziyod odam halok bo‘ladi-yu, hech kim buning uchun javobgar bo‘lmaydimi? Pandemiyaga aloqadorlarning hammasi — Mahammadkaliy Abulg‘oziyev, Kubatbek Bo‘ronov, Oltinoy Omurbekova (2020-yil apreligacha bosh vazir o‘rinbosari bo‘lgan, ijtimoiy siyosat mutasaddisi), ikki nafar sobiq sog‘liqni saqlash vaziri va Moliya vazirligi vakili — ularning hammasi javob beradi, biz ishni oxirigacha yetkazamiz”, — dedi Japikeyev jurnalistlarga 12-yanvar kuni.

Uning so‘zlariga ko‘ra, tergov koronavirusga qarshi kurash uchun chet eldan qancha moliyaviy, texnik va gumanitar ko‘mak olinganini aniqlashtirmoqda.

“Biz pandemiyaga aloqador bo‘lganlarning barchasini so‘roq qilmoqchimiz, hech kimga yon bosilmaydi. Birinchi navbatda, odamlarning o‘limi uchun javobgarlikka tortish kerak. Ehtimol, bunga aloqador bo‘lgan ko‘p odamlar hibsga olinishi mumkin”, — dedi Japikeyev.

Abulg‘oziyev va Bo‘ronov avvalroq Iqtisodiy jinoyatlarga qarshi kurash davlat xizmatiga COVID-19 tufayli gumanitar yordam yetkazilishida mablag‘larning maqsaddan tashqari ishlatilishi haqidagi ish bo‘yicha guvoh sifatida chaqirilgan edi. Bu ish bo‘yicha asosiy figurant Qirg‘iziston sobiq sog‘liqni saqlash vaziri Kosmosbek Cho‘lponboyev hisoblanadi.

Pandemiya boshidan buyon Qirg‘izistonda koronavirus va kasalxonadan tashqaridagi pnevmoniya bo‘yicha 82 495 ta holat aniqlangan, bemorlarning 1374 nafari vafot etgan. Mamlakatda COVID-19 tufayli favqulodda vaziyat rejimi amal qilmoqda.

Abulg‘oziyev Qirg‘iziston hukumatini 2018-yil apreldan 2020-yil 15-iyungacha boshqargan. Bo‘ronov esa iyundan oktabr boshigacha bosh vazir bo‘lgan.