Ўзбекистонда коммунал ташкилотлар томонидан 20 мингга яқин қонунбузарлик, жумладан, муддат бузилиши, рад этишнинг белгиланган тартибини бузишга йўл қўйилгани аниқланди, деб хабар бермоқда ДХА матбуот хизмати.
Агентлик 2020 йил давомида юридик ва жисмоний шахсларнинг ичимлик ва иссиқ сув тармоқларига уланиш, шунингдек, ҳисоблагичларни қиёслашдан ўтказишга оид хизматларни кўрсатиш жараёнини мониторинг қилган. Қонун бузилиши ҳолатларининг аксарияти Тошкент, Хоразм, Фарғона вилоятлари ҳамда Тошкент шаҳрига тўғри келаётгани аниқланган.
«Биринчидан, соҳада мурожаатларни кўриб чиқиш муддатларини бузиш ҳолатлари тез-тез учраб, бунга коммунал ташкилот ходимларининг мурожаатларга бирламчи вазифа сифатида қарамаслиги, мурожаатларни ўз муддатида бажарилишига моддий-техник базанинг мустаҳкам эмаслиги ҳамда ходимларнинг етишмаслиги сабаб бўлиб келмоқда. Иккинчидан, айрим ходимларнинг бепарволиги, масъулиятсизлиги ва сусткашлиги натижасида фуқароларнинг мурожаатларига ўз вақтида ва белгиланган тартибда жавоб берилмаган», — дейилади агентлик хабарида.
Хусусан, ДХА мониторинги вақтида қуйидаги қонунбузилишлар аниқланган:
- Фуқаро Х.Ж.нинг 2020 йил 8 январда ичимлик суви ҳисоблагичини қиёслашдан ўтказиш юзасидан юборган аризаси «Ўзсувтаъминот» АЖ томонидан кўриб чиқиш учун салкам 10 ой кечикиб қабул қилинган ва ариза асоссиз равишда рад этилган.
- Фуқаро А.Ш.нинг 2020 йил 29 сентябрда ичимлик суви ҳисоблагичини қиёслашдан ўтказиш юзасидан юборган аризаси бугунги кунга қадар кўриб чиқиш учун қабул қилинмаган.
- Фуқаро О.Т.нинг 2020 йил 25 майда иссиқ сув ҳисоблагичини қиёслашдан ўтказиш юзасидан юборган аризаси «Тошиссиққуввати» ДУК томонидан 6 ойга яқин муддатга кечиктирилиб қабул қилинган ва рад этилган.
«Энг ачинарли ҳолат шундаки, айрим коммунал ташкилотлар йўл қўйилаётган қонунбузилишлар халқнинг ушбу тизимга бўлган ишончи йўқолишига сабаб бўлишини ҳалигача тушуниб етишмаяпти. Бу соҳада ваколатли ташкилотлар йўл қўйилаётган ҳар қандай ҳуқуқбузарлик учун жавобгарлик муқаррар эканлигини англашлари керак», — дея таъкидланган агентликда ва масъул ташкилотлар қандай жавобгарликка тортилишини эслатиб ўтган.
Маъмурий жавобгарлик тўғрисидаги кодекснинг 215—5-моддасига асосан давлат хизматларини кўрсатишга оид қонун ҳужжатларини бузган мансабдор шахслар ва хизматчилар БҲМ (Базавий ҳисоблаш миқдори)нинг 3 бараваридан (20 январь ҳолатига кўра 669 минг сўмдан) 5 бараваригача (1 миллион 115 минг сўмгача), худди шундай ҳуқуқбузарлик бир йил давомида такрорланса, БҲМнинг 5 бараваридан 10 бараваригача (1 миллион 115 минг сўмдан 2 миллион 230 минг сўмгача) миқдорда жаримага тортилиши мумкин.
Изоҳ (0)