Жанубий Африка Республикаси (ЖАР)да декабрда пайдо бўлган коронавирус штамми тажовузкорроқ ва юқумлироқ, дея маълум қилди мамлакат бош эпидемиологи Салима Абдула Карима олиб борилган тадқиқотларга таяниб. Унинг гапларини «РБК» келтириб ўтди.
Фото: Reuters
Олимлар 501.V2 деб ном олган янги штамм одам ҳужайраларига осонроқ кириб олиб, у ерда мустаҳкамроқ ўрнашади, деган хулосага келди. Бунинг натижасида вирус аввалги мутацияларга нисбатан, тахминан, 50 фоизга кўпроқ юқумлидир, деди эпидемиолог.
ЖАР ҳукумати янги турдаги коронавирус аниқлангани ҳақида декабрь охирида маълум қилган эди. Мамлакатдаги пандемиянинг иккинчи тўлқинини айнан янги мутация билан боғлашди. Декабрда ЖАР соғлиқни сақлаш вазири Звели Мхизе касалхоналарга кўпроқ ёш беморлар келиб туша бошлаганини, улар COVID-19 туфайли оғир аҳволда ётқизилаётганини маълум қилганди. Шунингдек, Мхизе коронавируснинг янги штамми тезроқ тарқалаётганини айтиб, аммо мутация туфайли саросимага тушишга сабаб йўқлигини таъкидлаганди.
Жонс Ҳопкинс университети маълумотларига кўра, ЖАР коронавирусга чалинганлар ва бунинг оқибатида вафот этганлар сони бўйича Африка мамлакатлари орасида етакчилик қилмоқда — бу кўрсаткичлар тегишли равишда 1,34 миллион ва 37,4 мингга тенг.
Коронавируснинг «африкача» штамми Европа мамлакатларида, шу жумладан, Дания ва Францияда, Японияда, АҚШда ҳамда баъзи Африка мамлакатларида аниқланган.
Коронавируснинг ўзига хос мутациялари аниқлангани ҳақида декабрда бошқа бир қатор мамлакатлар, шу жумладан, Буюк Британия, Кения ва Нигерия ҳам маълум қилган эди. Англия бош санитар шифокори Крис Уитти янги штамм 70 фоизга юқумлироқ эканини, аммо касалликнинг оғирроқ кечишига олиб келмаслигини айтганди.
