COVID-19’га чалинган беморлар коронавирус симптомлари пайдо бўлгандан кейин саккиз-тўққиз кун давомида вирус тарқатувчи бўлиши мумкин. Бу ҳақда ЖССТнинг Россиядаги вакили Мелита Вуйнович 18 январь куни чоп этилган «Российская газета»га берган интервьюсида маълум қилди, деб хабар бермоқда «РБК».
«Юқумли бўлиш учун тирик вирусни тарқатиш керак. Дастлабки тадқиқотларга кўра, аксарият беморлар касаллик аломатлари пайдо бўлгандан кейин саккиз-тўққиз кун давомидагина юқумли ҳисобланади. Аммо инфекцион давр оғир беморларда узоқроқ бўлиши мумкин», — деган ЖССТ вакили.
Хабарда айтилишича, 2020 йил октябрь ойида «Роспотребнадзор» марказий эпидемиология илмий-тадқиқот институти клиник-таҳлилий ишлар бўйича директор ўринбосари Наталья Пшеничная коронавирусга чалинган беморда касаллик симптомлари пайдо бўлишидан икки кун аввал ва касалликнинг биринчи кунида бошқаларга касаллик юқтириш даражаси юқори бўлиши мумкинлигини маълум қилган.
2020 йилнинг май ойида эса сингапурлик олимлар коронавирус юқтириб олган беморлар касаллик белгилари аниқланганидан кейин 11 кун ўтгач, атрофдагиларга COVID-19’ни юқтира олмайди деб айтганди. Олимлар касалликдан тузалаётган беморлардан олинган таҳлиллар уларда коронавирус борлигини кўрсатади, бироқ ушбу даврда атрофдагиларга касаллик юқтириш хавфи бўлмаслигини қайд этган. Тадқиқотчилар тестларнинг коронавируснинг яшовчанлик хусусияти ва унинг бошқаларга юқишини олдиндан аниқлай олмаслиги, улар фақат геномнинг бир қисмини топаётганлигини билдирган.
Изоҳ (0)