Америка президенти Дональд Трампнинг сафдошлари президент билан алоқаларидан фойдаланган ҳолда судланган жиноятчиларни афв этишни лоббилаштириш хизматлари эвазига ўн минглаб доллар ишлаб топган. Бу ҳақда New York Times газетаси ҳужжатларга ва манбалар билан интервьюларга таяниб хабар берди, деб ёзади «РБК».
Газета ҳамсуҳбатлари иддао қилишича, Трамп кўплаб афв этиш ҳолатларидан шахсий ёки сиёсий иттифоқдошларини мукофотлаш учун фойдаланган. Газета маълумотларига кўра, Трамп сайловлардаги мағлубиятига қарши чиқа олмаслиги аниқ бўлганидан кейин афв этишлар сони кескин ўсган.
Мақолада Трамп ва унинг яқинларига алоқадор бир нечта лоббичи тилга олинади. Хусусан, собиқ федерал прокурор Бретт Толмен ўн минглаб доллар пул орттирган, у Оқ уйга афв этиш ва жазоларни юмшатиш масалалари бўйича маслаҳатлар берган. Бундай мукофотни Толмен камида учта иш бўйича қўлга киритган.
Афв этиш имкониятлари ҳақида Трампнинг собиқ адвокати Жон Дауд маълум қилган, у гўёки ўз мижозларига Трамп ва унинг ёрдамчиси Жаред Кушнер билан алоқаларидан фойдаланиб, афв этишга эриша олиши ҳақида айтган.
Яна бир лоббичи — Трамп штабининг собиқ маслаҳатчиси Карен Жорно махфий маълумотни фош қилишда айбдор деб топилган АҚШ Марказий разведка бошқармаси собиқ агенти Жон Кириакунинг афв этилишига ёрдам берган. Газета Жорно ва Кириаку ўртасидаги «президент Дональд Трампдан тўлиқ афвга эришиш тўғрисида»ги битим нусхасини қўлга киритган, унга мувофиқ, Жорно ўз хизматлари учун 50 минг доллар ва агар у афвга эришса, мукофот тариқасида яна 50 минг доллар олиши керак эди. Жорнонинг ўзи Трамп билан Кириаку ҳақида ҳеч қачон тўғридан-тўғри гаплашмагани ва унинг маъмуриятида афв этиш илтимоси билан лоббичилик қилмаганини айтди.
Аввалроқ CNN телеканали Оқ уйга яқин манбаларига таяниб, Трамп давлат раҳбари лавозимидан кетишдан олдин бир қатор шахсларни афв этиши мумкинлигини маълум қилган эди. Шунингдек, The New York Times маълумотларига кўра, Трамп ёрдамчилари билан президентлик муддати тугагунча ўзини афв этиш имкониятини муҳокама қилган. Бундан ташқари, у ўз оиласи аъзоларини ва яқинларини олдиндан афв этиши мумкинлиги ҳам хабар берилганди.
Изоҳ (0)