Туркия соҳиллари яқинидаги кема ҳалокатида 4 киши қурбон бўлди

Россиянинг қуруқ юк ташувчи Arvin кемаси Туркияда Қора денгизда ҳалокатга учраганидан кейин қутқариб олинган Россия фуқароси Николай Кринов фожиа ёмон об-ҳаво шароити туфайли юз берган бўлиши мумкинлигини айтди. Бу ҳақда «РБК» Россиянинг Анқарадаги элчихонасига таяниб хабар берди.

Кринов кеманинг катта техниги бўлган. Айни пайтда у Бартин шаҳридаги касалхонада. Унинг аҳволи барқарор деб баҳоланмоқда, ҳаёти учун хавф йўқ. Яна бир россияликнинг тақдири эса номаълум бўлиб қолмоқда.

Россия бош консуллиги ходимлари жабрланувчига консуллик ёрдамини тақдим этди, энг зарур буюмлар сотиб олиб берилди. Бундан ташқари, улар украиналик денгизчиларнинг ўз қариндошлари билан боғланишига ёрдам кўрсатди.

Айни пайтда қутқарув операцияси об-ҳаво шароити ёмонлашгани туфайли тўхтатиб қўйилган. Жами олти киши қутқариб олинган, улар орасида бир россиялик бор, дея маълум қилди «Росморречфлот».

«Бир киши касалхонага етказилди, бошқаларнинг аҳволи яхши», ­— дейилади хабарда.

Arvin қуруқ юк ташувчи кемаси 17 январь куни Инкуму яқинида ҳалокатга учраган эди. Кема Грузиянинг Поти портидан Болгариянинг Бургас портига қараб йўл олган. 15 январь куни кема Бартин портида турган. Ҳодисадан кейин қутқарувчилар экипаж аъзоларини қутқариш операциясини бошлаган. Туркия Миллий мудофаа вазирлиги маълум қилишича, воқеа жойига қидирув-қутқарув ишларида қатнашиш учун ҳарбий кема юборилган.

Бартин вилояти губернатори Синан Гюнер кема бортида 13 киши бўлгани, уларнинг барчаси Россия фуқаролари эканини маълум қилди. Кейинроқ кема ҳалокати оқибатида тўрт киши ҳалок бўлганини билдирди. Гюнернинг сўзларига кўра, кема ёмон об-ҳаво шароити туфайли ҳалокатга учраган.

Украина Ташқи ишлар вазирлиги матбуот котиби Олеа Николенко маълум қилишича, юк кемаси бортида 10 украиналик ва 2 чет эллик бўлган. Туркия қирғоқ соқчилиги маълумотларига кўра, олти денгизчи қутқариб олинган.

Украина кемалар реестри маълумотларига қараганда, Arvin қуруқ юк ташувчи кемаси Палау байроғи остида сузади. 2014 йилгача кема Россия кемалар халқаро реестрида бўлган. Ҳозирги пайтда у Одессанинг Tesoro Marine компанияси томонидан фойдаланилади.

Аввалроқ Россия байроғи остидаги Arvin қуруқ юк ташувчи кемаси Қора денгизда Туркиянинг Бартин вилояти соҳиллари яқинида чўкиб кетгани, икки киши ҳалок бўлгани хабар берилган эди.