Навальний 17 январь куни кечқурун Берлиндан Москвага қайтиб келди. Шереметьево аэропортида сиёсатчи «Ив Роше» иши доирасида қўлга олинди. Суд томонидан олдини олиш чоралари белгиланмагунича, у ҳибсда қолади. «РБК» Навальнийнинг Россияга қайтиши ва ҳибсга олиниши қандай юз бергани ҳақида умумий маълумот бериб ўтди.
Навальнийнинг қайтиши
Берлинда Навальний аэропортга ҳукумат машиналарида полиция ҳамроҳлигида етказилди. Bild газетаси ёзишича, рейс учун Алексей ва унинг рафиқаси Юлияни Германия федерал полицияси ходимлари рўйхатга олди, уларнинг ҳужжатлари эса махсус қора қутида келтирилди.Мухолифатчи ва унинг рафиқаси ўтирган самолёт келиб қўниши керак бўлган Внуково аэропортида ўша куни фақат чиптаси борларни кирита бошлашди, бино ёнида эса «автозак»лар (маҳбусларни ва айбланувчиларни ташиш учун махсус машина) навбатчилик қилди.
Aэропортда Навальнийнинг тарафдорлари ва журналистлар уни қарши олишга уринди. Полиция дастлаб халқаро учиб келишлар зали йўлини тўсиб қўйди, сўнг Навальнийни кутиб олувчиларни қўлга ола бошлади. Внуковода 55 киши, Шереметьевода яна уч киши қўлга олинган. Улар орасида Коррупцияга қарши кураш фонди (ККФ) ходимлари Любов Соболь ва Руслан Шаведдинов ҳам бор. Фаолларнинг бир қисми далолатнома тузилганидан кейин қўйиб юборилган.
Навальнийнинг самолёти Москванинг Внуково аэропортига маҳаллий вақт билан соат 19:20 да (Тошкент вақти билан 21:20) қўниши керак эди, аммо аэропорт техник сабабларга кўра самолётлар учун вақтинчалик ёпилди. Бортида Навальний бўлган самолёт Шереметьевога соат 20:12 да қўнди.
Внуковода аэропортнинг ёпилишини махсус техниканинг қорга тиқилиб қолгани билан изоҳлашди.
Навальнийнинг қўлга олиниши
Шереметьевода Навальний паспорт назоратидан ўтиш чоғида қўлга олинди.Жазоларни ижро этиш федерал хизмати аввалроқ мухолифатчини қўлга олиш чораларини кўришга ваъда берган эди. Хизматдагилар фикрича, сиёсатчи «Ив Роше» иши бўйича режимни бузган, унга мувофиқ Навальний ойда икки марта Жазоларни ижро этиш федерал хизмати органларига бориб, рўйхатдан ўтиши керак бўлган.
2014 йилда Навальний «Ив Роше Востик» иши бўйича шартли муддатга ҳукм қилинган эди. У 2018 йилда тугаган, синов муддати эса 2020 йил 30 декабрда якунланиши керак эди. Аммо бундан бир неча кун аввал Жазоларни ижро этиш федерал хизмати томонидан Навальнийга нисбатан шикоятлар ҳақида маълум бўлди. Муассаса маълум қилишича, мухолифатчи «суд томонидан юклатилган мажбуриятларини бажармаяпти ва жиноий-ижро инспекцияси назоратидан бош тортмоқда». «Шарите» клиникаси материалларига кўра, Навальний 20 сентябрда касалхонадан чиқарилган, 12 октябрда эса у соғлом бўлган, дейилади муассаса баёнотида. 12 январь куни пойтахтнинг Симоновский туман судида жиноий муддатни бекор қилиш ҳақидаги иш пайдо бўлгани маълум бўлди.
Навальнийнинг матбуот котиби Кира Ярмиш Жазоларни ижро этиш федерал хизмати баёнотига изоҳ берар экан, муассаса Навальнийнинг Германияда даволанаётганини била туриб, «инспекцияга эртага келиши»ни талаб қилаётганини айтди.
Навальний Россия ИИВнинг Химки шаҳар округи бўйича бошқармаси полицияси 2-бўлимида, дея хабар берди унинг адвокати Ольга Михайлова.
Навальнийнинг қўлга олинишига муносабатлар
Европа кенгаши раиси Шарль Мишель Навальнийни зудлик билан озод этишни талаб қилди. Худди шундай даъват билан Польша бош вазири Матеуш Моравецкий ва Болтиқбўйи мамлакатлари Ташқи ишлар вазирликлари чиқиш қилди. Латвия, Литва ва Эстония ТИВларининг қўшма баёнотида айтилишича, мухолифатчининг қўлга олиниши туфайли Евроиттифоқ Россияга қарши санкцияларни кўриб чиқиши керак. Австрия ва Франция ТИВлари ҳам сиёсатчини қўйиб юборишни талаб қилди.Сайланган президент Жо Байденнинг маслаҳатчиси Жейк Салливан Навальнийни озод этишга чақириб, унинг қўлга олинишини «шунчаки инсон ҳуқуқларининг бузилиши эмас, балки Россия халқига қаратилган чақириқ» деб атади. АҚШ давлат котиби Майкл Помпео Навальнийни «ҳеч қандай шартларсиз» озод этишни талаб қилди.
«Жаноб Салливанга (ва олдиндан тайёрлаб қўйилган изоҳларни эълон қилаётган бошқа кўплаб хорижий арбобларга) шуни айтмоқчиман: халқаро ҳуқуқни ҳурмат қилинг, суверен давлатлар миллий қонунчилигига тажовуз қилманг, ўз мамлакатингиздаги муаммолар билан шуғулланинг», — дея Ғарбнинг танқидига жавоб қилди Россия ТИВ расмий вакили Мария Захарова.
Россия президентининг матбуот котиби Дмитрий Песков таътилда бўлгани учун Навальнийнинг қўлга олинганидан бехабар эканини айтди: «Кечирасиз. Уни Германияда қўлга олишдими? Хабарим йўқ».
Алексей Навальний 2020 йил августдан бери Германияда эди. У Томск—Москва самолётида ўзини ёмон ҳис қилгани сабабли даволаниш учун олиб кетилган. Таҳлиллар натижасига кўра, Навальний «Новичок» гуруҳидаги модда билан заҳарлангани маълум бўлди. Декабрь ойида Bellingcat ва The Insider сиёсатчини Федерал хавфсизлик хизматининг саккиз нафар ходимидан иборат махсус гуруҳ заҳарлагани таъкидланган текширув натижаларини эълон қилди.
Изоҳ (0)