Наманганда «Аёл дунё безаги, меҳр-муҳаббат рамзи» шиори остида аёллар фестивали бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Фестиваль Давлатобод туманидаги «Ёш куч» стадионида спорт-мусиқа машғулотларидан иборат флешмобдан бошланди.
Шу ернинг ўзида Қизил ярим ой жамияти вилоят ташкилоти волонтёрлари бошқарувидаги 40 та Damas автомобили Наманган шаҳри ва Давлатобод туманидаги 40 та маҳаллага йўл олди. Автокарвон ушбу маҳаллалардаги 200 та хонадонга санитария-гигиена воситалари, тиббиёт аптечкалари ва 500 минг сўмдан пул етказди.
Наманган шаҳри ва Давлатбод тумани ФҲДЁ бўлимларида вилоят адлия ва давлат хизматлари агентлиги бошқармалари томонидан сайёр қабуллар ташкил этилди. Адвокатлар, нотариуслар, судьялар, нодавлат-нотижорат ташкилотлари вакиллари, давлат хизматлари маркази ходимлари хотин-қизларга ҳуқуқий маслаҳатлар берди.
Аёллар фестивали доирасида Наманган шаҳридаги 8 та мактабда хотин-қизлар учун тиббий кўриклар ташкил қилинди. Мобил поликлиника, кўчма рентгент қурилмаси, ультратовуш текшируви, лаборатория ва ЭКГ хизматлари уларнинг ихтиёрида бўлди.
Мактаблар спорт зали поликлиника тусини олди. Ўнлаб тор соҳа мутахассислари — акушер-гинеколог, жарроҳ, эндокринолог, кардиолог, невропотолог, оккулист, онколог, ревматолог, гематологлар юзлаб аёллар ва уларнинг фарзандларини қабул қилди.
Касаллиги аниқланган хотин-қизлар алоҳида рўйхатга олинди. Вилоятдаги бир қатор нодавлат тиббиёт муассасалари уларни бепул даволаш истагини билдирди.
Наманган шаҳридаги мусиқа ва санъат мактабида кенг кўламли саховат тадбири ташкилланди. Мазкур тадбир давомида «Аёллар дафтари»га киритилган ва «Меҳр-3» операцияси давомида мамлакатга қайтариб олиб келинган хотин-қизларга 10 та ногиронлик аравачаси, 10 та музлатгич, 50 та микротўлқинли печ, 50 та чангютгич ва 70 та тикув машинаси тақдим этилди.
Шунингдек, 5 нафар аёлнинг уйи бепул таъмирлаб бериладиган ва яна шунча аёлнинг бир йиллик ижара пули тўлаб бериладиган бўлди.
Олий таълим муассасаларида таълим олаётган 10 нафар қизнинг бир йиллик тўлов-шартномаси учун 35 миллион сўм, 15 нафар техникум талабасининг йиллик тўлов-шартномаси учун эса 63 миллион сўм, жами 98 миллион сўм ажратилди.
— Аёлларимизга қанча кўп эътибор берсак, шунча кам. Биз уларнинг муаммо ва ташвишлари, эҳтиёжларини уйма-уй юриб аниқлаяпмиз. Бугунги тадбирни ҳам мана шу ўрганишлар натижаси сифатида қабул қилиш мумкин, — дея таъкидлади вилоят ҳокими Шавкатжон Абдураззақов.
Наманган шаҳрида аёллар ва ёшлар дафтарига киритилган ишсиз фуқаролар бандлигини таъминлаш мақсадида бўш иш ўринлари «Меҳнат ярмаркаси» ҳам ташкил этилди. Унда тикувчилик касбига ўқиб, сертификат олган, ярмарка доирасида «Тикувчи аёллар» кооперативига ишга кирган 110 нафар аёлга субсидия шартлари асосида тикув машиналари тақдим этилди. Уларга уй шароитида даромад топишлари учун маҳсулотлар етказиб бериладиган бўлди.
Аёллар фестивали доирасида Наманган шаҳридаги Ёшлар марказида модалар намойиши ҳам бўлиб ўтди. Унда наманганлик истеъдодли дизайнерларнинг миллий ва замонавий либослари намойиш этилди.
Шу ернинг ўзида ўқув маркази раҳбарларига аёллар дафтарига кирган хотин-қизларга касб-ҳунар ўргатишлари учун 5 млн сўмдан 10 млн сўмгача бўлган сертификатлар топширилди. Бунинг натижасида ижтимоий ҳимояга муҳтож аёллар ушбу ўқув марказларида бепул касб-ҳунар ўрганиш имкониятига эга бўлади.
Аёллар фестивали вилоят маданият саройидаги гала-концерт билан якунланди. Унда Ўзбекистон халқ артистлари Зулайҳо Бойхонова ва Абдуҳошим Исмоилов, вилоят санъаткорлари ва ижрочи ёшларнинг концерт дастури намойиш этилди.
Фестиваль якунларига бағишланган матбуот анжуманида таъкидланишича, фестиваль Намангандаги 22 та манзилда ўтказилди ҳамда тадбирлар давомида аёллар дафтарига киритилган 1,5 минг нафардан ортиқ хотин-қизнинг муаммоларига ечим топишга муваффақ бўлинди.
Изоҳ (0)