Қашқадарё ҳокими Зоир Мирзаев ўринбосарлари ва 15 нафар ҳудуд ҳокими тиббий кўрикдан ўтиш ҳамда даволаниш мақсадида Тошкент шаҳрига жўнаб кетди. Бу ҳақда вилоят ҳокимлиги ахборот хизмати хабар берди.
Таъкидланишича, вилоят раҳбари Зоир Мирзаев 17 январь, якшанба куни масъулларни Тошкент шаҳрига кузатган.
«Тарихда биринчи бор даволаниш учун кетяпсизлар. Демак, дам олишга боряпманми ёки даволанишга деган фикр ҳаммада бўлиши керак. Сизнинг саломатлигингиз жамиятга ҳам, оила аъзоларингизга ҳам керак. Эртадан ўрнингизни вақтинча ёшлар эгаллайди. Президентимиз таъкидлаганларидек, халқчил бўлишнинг бирдан бир усули — халқнинг дард-у ташвишлари ичида бўлишдир. Ёш раҳбарлар билан битта бўлса-да, халқ дардига ечим топсак ҳам, бу катта ютуқдир», — деган Зоир Мирзаев ҳокимларни кузатар чоғида.
Маълумот берилишича, вилоят ҳокими ўринбосарлари, туман ва шаҳар ҳокимлари 10 кун давомида Тошкентда тиббий кўрик натижаларига кўра даволаниб, сўнгра ўз фаолиятини бошлайди.
Эслатиб ўтамиз, 7 январь куни Қашқадарё ҳокими Зоир Мирзаев бошчилигидаги туман ва шаҳар ҳокимлари, шунингдек, вилоят ҳокимининг барча ўринбосарлари бирламчи тиббий кўрикдан ўтганди. Тиббий кўрик вилоят кўп тармоқли тиббиёт поликлиникасида амалга оширилган.
Маълумот учун, Ўзбекистондаги амалдаги қонунчиликка кўра вилоят ҳокимлари ҳукумат қошидаги тиббиёт бош бошқармаси рўйхатида туради. Уларга зарур ҳолатларда тиббий диагностика қилиш, даволаш, умуман олганда, уларнинг саломатлигини муҳофаза қилиш мазкур бошқарма зиммасида.
Шунингдек, Ўзбекистонда вилоят ҳокимлари босқичма-босқич қисқа муддатли таътилга чиқаётгани хабар қилинганди.
Изоҳ (0)