Олий Мажлис Қонунчилик палатаси депутати Расул Кушербаев фуқаролардан келаётган мурожаатларнинг аксарияти суд фаолияти ва қарорларидан норозилик билан боғлиқ эканлигини айтиб, Олий суд вакилларининг фуқаролар учун қабул эшикларини ёпиб олганини танқид қилганди. Олий суд матбуот хизмати муҳокамага сабаб бўлган ушбу масалага муносабат билдирди.
Қайд этилишича, мамлакатда карантин чоралари кучайтирилган кезларда Олий суд Раёсатининг 2020 йил 20 мартдаги қарорига асосан, судларда фуқароларнинг шахсий қабули, шу жумладан, Олий суд раиси ва раис ўринбосарлари қабули махсус буйруқ чиққунга қадар тўхтатиб турилган.
Аммо шикоят ҳамда аризалар электрон шаклда info@supcourt.uz почта манзили орқали қабул қилиш, уларнинг амалдаги қонунчиликка мувофиқ кўриб чиқилиб, қонуний ҳал этиш чоралари кўрилган. Судларга электрон мурожаатлар, шунингдек, Олий суд раҳбарияти қабулига электрон рўйхатдан ўтиш Олий суднинг интерактив хизматлари портали my.sud.uz орқали ҳам амалга оширилган.
«Бинобарин, Олий суд раҳбарияти томонидан фуқароларнинг қабули мутлақо амалга оширилмади, деган иддаолар асоссиз», — дейилади муносабатда қатор статистик маълумотлар келтирилган.
Унга кўра,
- 2020 йил мобайнида Олий суд раҳбарияти томонидан жами 5 896 нафар фуқаро қабул қилинган. Уларнинг 1 876 нафари бевосита Олий судда, 3846 нафари сайёр қабулларда, 174 нафари видеоконференсалоқа тизими ёрдамида қабул қилинган.
- Шунингдек, 2020 йил мобайнида Олий суд раиси томонидан 341 нафар (бевосита Олий судда 254 нафар, видеоконференсалоқа тизими орқали эса 87 нафар) фуқаро қабул қилинган.
- Олий суд раисининг биринчи ўринбосари Робахон Маҳмудова томонидан 2020 йил мобайнида 428 нафар (бевосита Олий судда 28, сайёр қабулларда 392 нафар, видеоконференсалоқа тизими орқали 8 нафар) фуқаро қабул қилинган.
- Олий суд раисининг ўринбосари Икром Муслимов томонидан 1 472 нафар (бевосита Олий судда 685, сайёр қабулларда 775 нафар, видеоконференсалоқа тизими орқали 12 нафар) фуқаро қабул қилинган.
- Олий суд раисининг ўринбосари Бахтиёр Исаков томонидан эса 2 416 нафар (бевосита Олий судда 113, сайёр қабулларда 2 303 нафар) фуқаро қабул қилинган.
- 2020 йил 4-чорагида Олий суд қабулхонасига ташриф буюрган 631 нафар фуқаронинг ариза ва шикоятлари қабул қилиб олинган ва ушбу мурожаатларнинг қонуний ҳал этилиши таъминланган.
Билдирилишича, мазкур тартибга асосан, ҳар бир судья мустақил эканлиги нуқтаи назаридан холисликни таъминлаш мақсадида Олий суд раисининг қабулига раис ўринбосарининг қабулидан кейин (раис ўринбосарининг жавоб хатидан норози бўлган тақдирда) ўринбосарлар қабулига тегишли судлов хайъатлари томонидан чиқарилган қарордан норози бўлган фуқароларнинг киришлари белгиланган.
«Ушбу тартибдан бехабар айрим фуқаролар ўртасида баъзан тушунмовчиликлар юзага келиши табиий, албатта. Бундай норозиликларни ижтимоий тармоқларда зудлик билан тарқатиб юбориш орқали кенг жамоатчилик ўртасида судларга нисбатан салбий фикрлар юзага келаётганидан ҳам кўз юмолмаймиз», — дейилади муносабатда.
Шунингдек, пандемия муносабати билан Олий суд раҳбарияти томонидан фуқаролар қабулини тўлақонли амалга ошириш имконияти бўлмаганлиги, ўз навбатида, айни шу мураккаб вазият сабабли баъзи фуқароларга судга мурожаат қилиши учун ноқулай вазият юзага келганлигини инкор этиб бўлмаслиги таъкидланган.
«Бугунги кунда Олий суд раҳбарияти, умуман айтганда, судларда фуқароларнинг қабули белгиланган тартибда ва карантин қоидаларга тўлиқ риоя қилинган ҳолда амалга оширилмоқда», — дея якунланган Олий суд муносабати.
Изоҳ (0)