Ўзбекистонда 2020 йил давомида жами 1 723 нафар мансабдор шахслар жиноий жавобгарликка тортилган. Бу ҳақда Бош прокуратура матбуот хизмати хабар берди.
Қайд этилишича, ушбу мансабдор шахсларнинг жиноятлари оқибатида давлат ва жамият манфаатларига 500,1 миллиард сўм миқдорида моддий зарар етказилган бўлиб, тергов жараёнида ушбу зарарнинг 355,7 миллиард сўми ундирилган.
Жиноий жавобгарликка тортилган мансабдорларнинг 58 нафари мансаб ваколатини суиистеъмол қилган, 132 нафари коррупцияга, 227 нафари фирибгарликка йўл қўйган. Унинг 835 нафари эса ўзганинг мулкини ўзлаштириш ёки растрата йўли билан талон-торож қилгани сабабли жавобгарликка тортилган.
Ушбу мансабдорларнинг 9 нафари республика миқёсидаги, 45 нафари вилоят миқёсидаги, 1669 нафари эса туман (шаҳар) миқёсидаги ходимлар.
Аввалроқ Коррупцияга қарши курашиш агентлиги директори Акмал Бурҳонов давлат амалдорларининг хорижда активлар сотиб олишини тартибга солиш вақти келгани, шунингдек, коррупционeрлар шахси ҳақидаги маълумотлар эълон қилиб бориладиган платформа ишлаб чиқилаётганини маълум қилганди.
Изоҳ (0)