«Ўртадаги вагонларда етарлича жой бўлади». Тошкент метрополитени станция платформаларида тиғиз вақтда одамлар тўпланиб қолаётгани тўғрисидаги хабарларга изоҳ берди

Тошкент метрополитени ижтимоий тармоқларда «Чилонзор», «Мирзо Улуғбек» ва «Новза» станцияларида куннинг тиғиз вақтида йўловчилар тўпланиб қолаётгани тўғрисида тарқалган хабарларга муносабат билдирди.

Маълум қилинишича, ҳозирда пойтахт метрополитенининг барча линиялари поездлар ҳаракатининг белгиланган жадвали бўйича ишламоқда. Чилонзор линиясида Сергели йўналишини очилганидан сўнг, йўловчилар оқими тиғиз вақтда (эрталабки соат 07:00—09:00 ва кечки соат 17:00—19:00 ларда) ортиб кетган. Юзага келган ҳолат бўйича айни вақтда Тошкент метрополитени УК томонидан поездлар таркибининг ҳаракатланиш вақти оралиғини қисқартириш, йўловчилар оқими камайгач эса, яна ошириш борасида чоралар кўрилмоқда.

«Тошкент метрополитенидан ҳар куни 250 мингдан ортиқ одам фойдаланади. Тошкент метрополитени УК раҳбарияти томонидан йўловчиларга хизмат кўрсатиш сифатини яхшилаш бўйича барча зарурий чоралар кўрилмоқда», — дейилади хабарда.

Шу билан бирга, таъкидланишича, аксарият ҳолларда йўловчиларнинг бутун платформа бўйлаб тўғри тақсимланмайди. «Йўловчилар кўпинча поездларнинг фақат бош ёки дум қисмига киришга уринади, қолган вагонларда эса етарлича жой бўлади», — дейилади хабарда.

Қайд этилишича, йўл ҳақини тўлашнинг Ягона транспорт картаси жорий этилгани сабаб кассалар олдида одамларнинг тўпланиши юзага келмоқда. Тошкент метрополитени тўловларни касса чипталаридан ташқари бошқа муқобил усуллар орқали ҳам амалга ошириш мумкинлигини эслатиб ўтган, масалан, АТТО иловаси (QR-кодлар генерацияси), NFC технологияси, PayMe ва Apelsin тўлов тизими, Humo тўлов тизими банк карталари. Бундан ташқари, қатор кассалар олдига махсус инфокиоскалар ҳам ўрнатилган бўлиб, йўловчилар унинг ёрдамида Ягона транспорт картаси балансини тўлдира олади.

Telegram’даги «Ко дну» канали метрополитен раҳбариятининг ушбу муносабатига қатор саволлар билан мурожаат қилган.

«5 вагонли таркиблар. Қани улар?, Янги станцияларни янги таркиблар очиш. Харидлар қани? Автобус маршрутларини оптималлаштириш. Йўли бўлмаса ҳам одамларни метрога қувмоқда. Сиз буни хоҳлармидингиз?», — дея савол беради канал муаллифи.

Аввалроқ Шавкат Мирзиёев метрони ривожлантириш лойиҳасини охиригача етказиш топшириғини берганди. Хусусан, «Ўзбекистон» линиясининг «Беруний» станциясидан Қорақамиш даҳасига қадар иккита станцияни қуриш таклиф этилмоқда.