Миш-мишлар тасдиғини топди, Apple ортидан Samsung ҳам смартфонлар қутисидан қувватлантиргич ва наушникларни олиб қўйди. Бироқ Galaxy S21 Ultra флагмани стилусга эга бўлган, аммо уни ҳам алоҳида харид қилишга тўғри келади, деб хабар беради Hi-Tech.Mail.ru.
Коронавирус сабаб 2021 йилда Samsung флагманлари тақдимотини бир ой олдинга кўчирди. Одатда Galaxy S линейкаси февралда, MWC кўргазмаси доирасида намойиш этилади, бироқ у ёзга кўчирилди. Шу сабабли компанияда ушбу тадбирни кутишдан маъни қолмади.
Дизайн
Samsung’нинг янги линейкасида ўтган йилгидек бир вақтнинг ўзида учта модель пайдо бўлди — базавий Galaxy S21, каттароқ ўлчамдаги Galaxy S21+ ва Galaxy S21 Ultra premium. Смартфонлар бир хил услубда яратилган, компания улар учун янги дизайн ўйлаб топган: камералар модули эндиликда ён ҳошиялар билан қўшилиб кетган. Олд қисмида эса ҳамон фронтал камера кичикроқ қирқим ичида жойлашган, экран остига яширинмаган.
Смартфонларнинг корпуси сув ва чангдан IP68 стандарти бўйича ҳимояланган. Олд томонига янги авлод Gorilla Glass Situs ҳимоя ойнаси ўрнатилган, Galaxy S21+ ва S21 Ultra’нинг орқа қисми ҳам шу каби ойна билан қопланган.
Galaxy S21’нинг орқа қопқоғи шишадан эмас, балки пластикдан ишланган. Компаниядагиларнинг маълум қилишича, у жуда ҳам шишага ўхшайди, бироқ унда тирналишлар изи кам қолади ва ерга тушганида дарз кетмайди. Ушбу материал учун ҳатто маркетинг ном ҳам ўйлаб топилган— Glastic— Glass(шиша) ва Plastic (пластик) номлари бирлашмаси.
Дисплей
Шунингдек, компания смартфонлар экранига ҳам бошқача ёндашган. Galaxy S21 ва S21+ сифати Full HD+ га қадар туширилган, QHD+ фақат S21 Ultra’да қолган. Ўтган йилги Galaxy S20 ларнинг барчасида QHD+ эди. Аслини олганда, улар орасидаги фарқ у қадар сезиларли эмас.Қолган жиҳатлари стандарт — Samsung’нинг ўзи ишлаб чиқарадиган Dynamic AMOLED матрицаси. Қурилмаларнинг барчаси 120 герцли янгиланиш частотасини қўллаб-қувватлайди. Galaxy S21 Ultra рекорд даражада ёрқинликка — 1500 нит ва дисплейнинг кенгроқ янгиланиш частотаси диапазонига эга бўлган.
Экран борасида Galaxy S21 Ultra’гина ажралиб туради — у S Pen стилусига эга бўлган. Бироқ корпусда унинг учун жой топилмаган бўлиб, уни алоҳида ҳамёнда олиб юриш ёки қўшимча махсус ғилоф харид қилиш керак. Стилуснинг ўзи ҳам алоҳида сотилади.
Камералар
Galaxy S21 ва S21+ учта камерадан иборат стандарт жамланмага эга бўлган — асосий 12 Мп, кенг бурчакли 12 Мп ва 64 Мп телефото.
Энг қизиқарли янгилик Galaxy S21 Ultra’да — у бешта камерага эга боўлган. Асосий камераси 108 мегапикселни ташкил этади. Шунингдек, компания 10 мегапикселли иккита телефотокамера қўшган — улардан бири 3 карра, иккинчиси 10 карра зумга эга. Биринчиси портретлар учун мос келса, иккинчиси объектларни узоқдан суратга олишда қўл келади.
Ишлаш самарадорлиги
Смартфонларнинг учаласига ҳам янги Exynos 2100 ва Snapdragon 888 процессорлари ўрнатилган. Модель бозорга боғлиқ — масалан, Россияда Exynos’да ишлайдиган смартфонлар сотувга чиқади. Тестларга ишониладиган бўлса, Samsung процессори жорий йилда кўп ядроли тестларда Qualcomm’нинг чипларидан кучлироқ бўлиб чиққан.
Хотира борасида ҳеч қандай янгилик йўқ. Galaxy S21 ва S21+ 128 ёки 256 гигабайт ички ҳамда 8 гигабайт тезкор хотирага эга бўлади, S21 Ultra’да эса 128/256/512 гигабайт ички ва 12 ёки 16 гигабайт тезкор. Барча моделлар учун аккумулятор сиғими ҳам стандарт — мос равишда 4000 мА/соат, 4800 мА/соат ва 5000 мА/соат.
Смартфонларнинг барчаси 25 ватлли симли ва 15 ваттли симсиз қувватланиш функциясига эга, бироқ қурилмалар қутисида қувватлантиргич йўқ.
Нархлар:
- Galaxy S21 — 128 ГБ учун 1020 доллар;
- Galaxy S21+ — 128 ГБ учун 1220 доллар;
- Galaxy S21 Ultra— 128 ГБ учун 1500 доллар.
Изоҳ (0)