Xiaomi компанияси ҳам АҚШ томонидан «қора рўйхат»га киритилди

Дональд Трамп администрацияси Хитойнинг 10 та компаниясини «қора рўйхат»га киргизди, деб хабар беради IXBT.

Ушбу компаниялар АҚШ Мудофаа вазирлиги томонидан «Хитойнинг коммунистик ҳарбий компаниялари» рўйхатига киритилган. «Қора рўйхат»га киритилган компаниялар орасида Xiaomi ҳам ўрин олган.

Ҳозирча Xiaomi билан боғлиқ вазият 2019 йилда Huawei дуч келган вазиятдан яхшироқ. Афтидан, Huawei ва Xiaomi турли даражадаги санкциялар рўйхатига киритилган.

Xiaomi’га Google ва Qualcomm каби компаниялар билан савдо қилиш ва ҳамкорлик тақиқланмаган, шу сабабли Xiaomi ҳамда Redmi смартфонларига Android ва SoC Snapdragon’лар ўрнатилишидан хавотирланмаса бўлади.

Аммо америкалик инвесторларга Xiaomi’га сармоя киритиш тақиқланган. Бундан ташқари, америкалик инвесторлар 2021 йилнинг 11 ноябрига қадар ўзларига тегишли Xiaomi акцияларини сотиб юбориши керак. Буларнинг барчаси компания акциялари нархининг тушишига олиб келади.

Эслатиб ўтамиз, 2020 йилнинг июль ойида АҚШ Huawei ва Хитойнинг бошқа технологик компаниялари учун виза чекловларини жорий қилган эди. Давлат департаментининг маълум қилишича, бу компаниялар инсон ҳуқуқларининг бузилишида иштирок этаётган мамлакатлар расмийларига ёрдам кўрсатмоқда.