Xiaomi Mi 11 фойдаланувчилари смартфонда мусиқа янграган вақтда орқа қопқоққа босилганда ноодатий товуш чиқаётганидан шикоят қилди, деб хабар беради Hi-Tech.Mail.ru.
Қурилманинг расмий савдолари 1 январдан бошланган ва шундан буён ижтимоий тармоқларда Xiaomi Mi 11’нинг ишлашига оид кўплаб фикрлар қолдирилган. Хусусан, смартфоннинг айрим эгалари мусиқа тинглаш вақтида пайдо бўлаётган тушунарсиз шовқинни пайқаган. У 5-10 сония пайдо бўлади, кейин эса фойдаланувчи орқа қопқоқни босишни тўхтатганида йўқолади.
Компаниядагиларнинг тушунтиришича, пайдо бўлаётган овоз — нуқсон эмас, қурилманинг ўзига хослигидир. Шовқин смартфон ичидаги стереодинамиклар тизимини яхшилаш учун қолдирилган махсус бўшлиқ ёрдамида пайдо бўлади. Унинг ҳисобига овоз ҳажмдор бўлади, кучайтирилган баслар эса уни «яхшироқ» ҳис қилишга хизмат қилади.
Махсус бўшлиқ деформацияланганда фойдаланувчи трекларнинг бузилган овозини эшитиши мумкин.
Ишлаб чиқарувчи Xiaomi Mi 11’нинг орқа қопқоғини нафақат мусиқа тинглаш вақтида, балки кундалик фойдаланишда ҳам қаттиқ босмасликни тавсия қилган. Бу қурилмага шикаст етмаслиги ва овоз сифатининг ёмонлашмаслигига хизмат қилади.
Хитойда 8/128 гигабайтли Xiaomi Mi 11 3999 юань (699 доллар) нархида сотувга чиқди.
Изоҳ (0)