Rossiyalik taniqli bloger Ilya Varlamov va “Mediazona” noshiri, aksionisti Pyotr Verzilov Janubiy Sudan davlatiga sayohati paytida hibsga olindi. Bu haqda Varlamov o‘zining Telegram kanalida ma’lum qildi. Meduza’ning yozishicha, ulardan tashqari Varlamovning rafiqasi Lyubov va Yevropa gimnaziyasi direktori, bloger Ivan Bogansev va ularning tanishi Vadim Ginzburg ham hibsga olingan.

Ma’lum qilinishicha, rossiyaliklar Varlamovning yukidan topilgan dron pulti tufayli parvozdan olib qolinib, politsiyaga olib ketilgan. Mahalliy xavfsizlik xodimlarining fikricha, ular “harbiy obyektlarni drondan tasvirga olgan bo‘lishi mumkin”. Dron ulardan Ugandada sayohat qilib yurgan vaqtlaridayoq olib qo‘yilgan.

Varlamov blogida aytilishicha, ulardan qo‘l telefonlarini tortib olmoqchi bo‘lishgan, ammo ular politsiyaga berishdan bosh tortgan. Hozir ular to‘liq tekshiruvni kutmoqda. Hibsga olinganlar elchixonaga murojaat qilgan. Rossiyalik diplomatlar Varlamov va Verzilov ular bilan bog‘langanini “Interfaks”ga tasdiqlagan va ma’lumotni tekshirmoqda. Rossiya TIV rasmiy vakili Mariya Zaxarova diplomatlar ularni ozodlikka chiqarishga harakat qilayotganini ma’lum qilgan.

Varlamovning taxminiga ko‘ra, sudanlik harbiylar undan shunchaki dronni musodara qilmoqchi bo‘lgan, ammo uni topa olmagach xafa bo‘lib ularning hammasini hibsga olgan.

Rossiyaliklar Afrikaga dekabr oyining oxirida oddiy sayyoh sifatida borgan.

Eslatib o‘tamiz, rossiyalik taniqli bloger Ilya Varlamov Andijonda sodir bo‘lgan “samosud”dan keyin O‘zbekistonga kelish fikridan qaytgandi.