Janubiy Sudanda qo‘lga olingan Pussy Riot ishtirokchilari Pyotr Verzilov va bloger Ilya Varlamov qo‘yib yuborildi. Bu haqda Rossiya Tashqi ishlar vazirligi ma’lum qildi, deb xabar beradi Meduza.
Shuningdek, ular bilan birga qo‘lga olingan boshqa rossiyaliklar ham ozod etilgan — Varlamovning rafiqasi Lyubov, bundan tashqari, Yevropa gimnaziyasi direktori Ivan Bogansev va uning do‘sti Vadim Ginzburg.
TIVning ma’lum qilishicha, hozirda Rossiya fuqarolarining Janubiy Sudandan chiqib ketishi borasidagi masalalar hal etilmoqda.
Eslatib o‘tamiz, rossiyalik taniqli bloger Ilya Varlamov va “Mediazona” noshiri, aksionisti Pyotr Verzilov Janubiy Sudanga sayohati paytida — 13-yanvar kuni hibsga olingandi.
Ma’lum qilinishicha, rossiyaliklar Varlamovning yukidan topilgan dron pulti tufayli parvozdan olib qolinib, politsiyaga olib ketilgan. Mahalliy xavfsizlik xodimlarining fikricha, ular “harbiy obyektlarni drondan tasvirga olgan bo‘lishi mumkin”. Dron ulardan Ugandada sayohat qilib yurgan vaqtlaridayoq olib qo‘yilgan. Varlamovning taxminiga ko‘ra, sudanlik harbiylar undan shunchaki dronni musodara qilmoqchi bo‘lgan, ammo uni topa olmagach xafa bo‘lib ularning hammasini hibsga olgan.
Avvalroq Ilya Varlamov Andijonda sodir bo‘lgan “samosud”dan keyin O‘zbekistonga kelish fikridan qaytgandi.
Izoh (0)