Facebook ва Twitter икки кун ичида жами 51 миллиард доллар йўқотди, деб хабар беради Business Insider.
10 январь куни иккала платформа ҳам АҚШнинг амалдаги президенти Дональд Трампнинг аккаунтларини блоклаб қўйган эди. Нашрнинг ёзишича, бунга инвесторлар «сезиларли даражда қаршилик кўрсатган».
Акциядорлар ижтимоий тармоқ қарори фойдаланувчиларни ундан кетишга мажбур қилишидан хавотирга сабаб қимматли қоғозларни сотишга тушган, бу эса Facebook акцияларининг қийматининг 11 январь куни 4 фоизга, 12 январь куни яна 2 фоизга тушиб кетишига олиб келган.
Twitter акциялари 11 ва 12 январь кунлари мос равишда 6,4 ҳамда 2,4 фоизга арзонлашган. Икки кунлик савдолар натижасига кўра, 8 январдан буён Facebook капиталлашуви 47,6 миллиард долларга қисқарган. Twitter’нинг бозор қиймати 11—12 январда эса 3,5 миллиард долларга тушиб кетган.
13 январь Тошкент вақти билан соат 23:40 ҳолатига кўра, Facebook’нинг бозор қиймати 715,2 миллиард долларни, Twitter эса 47,7 миллиард долларни ташкил этмоқда.
Аввалроқ YouTube Дональд Трампнинг каналини «музлатиб» қўйгани тўғрисида хабар берилганди.
Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда тўрт киши ҳалок бўлгани айтилмоқда.
Шундан сўнг Facebook ва Instagram Трампни 24 соатга, Twitter эса 12 соатга блоклаб қўйди. Кейинроқ, 7 январь куни АҚШ Конгресси мажлисини давом эттириб, Жо Байден АҚШнинг 46-президенти этиб сайланганини тасдиқлади ва унинг инаугурациясини 20 январга белгилади.
Изоҳ (0)