Соғлиқни сақлаш вазирлиги томонидан юритилаётган коронавирус статистикасидан кўзланган мақсад — халққа тўғри маълумот бериб, «ваҳималарга олиб келадиган маълумотларга чек қўйиш». Бу ҳақда вазирлик раҳбари Абдуҳаким Ҳожибоев «Дарё» мухбири Миролим Исажоновга берган қисқа интервьюсида айтиб ўтди.

ССВ томонидан юритилаётган коронавирусга доир расмий статистика маълумотларига кўра, Ўзбекистонда 2020 йил мартидан бери ҳозирга қадар 78 мингдан камроқ одамда COVID-19 инфекцияси тасдиқланган, шундан расман 617 киши касаллик асоратлари оқибатида вафот этган. Ўзбекистонлик амалдорлар кўп ҳолларда айни шу статистика маълумотларига таяниб, «Ўзбекистонда пандемия оғир ўтмади, йўқотишлар кўп бўлмади», қабилида фикр билдирмоқда.

Хусусан, декабрь ойида Ўзбекистон Сенати раиси Танзила Норбоева Гендер тенгликни таъминлаш масалалари бўйича комиссия йиғилишида, жумладан, шундай деганди: «Пандемия шароитида одамларимиз жуда қийналди, бутун дунё қийналди. Шунга қарамай, мамлакатимиз бу вазиятдан яхши чиқа олди. Касаллик профилактикаси, уни даволаш ва камбағаллик, бизнесни қўллаб-қувватлаш нуқтаи назаридан Ўзбекистон ушбу синовларни муваффақияли енгди. Биз қийналганимиз йўқ».

Шу муносабат билан соғлиқни сақлаш вазиридан унинг ўзи ушбу статистик маълумотларга қандай муносабатда экани, унга қанчалик ишониши ҳақида сўралди. Вазир Ҳожибоев бу ўзи раҳбарлик қилаётган ташкилот юритаётган статистикага мутлақо ишонишини таъкидлади, «чунки тўғри».

Абдуҳаким Ҳожибоев.

Фото: Мадина Нурман / «Дарё»

Бу статистика маълумотини Соғлиқни сақлаш вазирлиги тайёрлайди ва унга тўлиқ ишонаман. Чунки у тўғри. Бу беморда нафақат клиник белгилар, балки ПЗР ёрдамида ковид тасдиқланган ҳолатлар кўрсаткичидир. Пневмония, шунга ўхшаш клиник белгилар билан тушиш мумкин. Агар уларда ПЗР тасдиқланмаса, рўйхатга кирмайди. Бундайлар ҳам бор, албатта.

Статистика ҳамма давлатларда олиб борилади. Мақсад — халққа тўғри маълумот бериб, ҳар хил гумон ва ваҳималарга олиб келадиган маълумотларга чек қўйиш.

Абдуҳаким Ҳожибоев, соғлиқни сақлаш вазири

Қайд этиш жоиз, ССВга алоқадор бошқа мансабдорлар Ўзбекистонда коронавирус билан касалланиш ҳолатлари расмий статистикадагидан бир неча бор кўп бўлиши мумкинлигини инкор қилмайди. Бундан ташқари, январь ойида Тошкент шаҳрида коронавирусга қарши вакцина синовида иштирок этиш истагини билдирган 3 минг кўнгиллининг 30 фоизида коронавирус симптомларсиз кечгани, бироқ уларнинг ўзи бундан бехабар қолгани маълум бўлганди.