Ҳатто бир қатор мамлакатларда вакцинация бошланганига қарамай, 2021 йилда коронавирусга нисбатан жамоавий иммунитет пайдо бўлмайди. Бу ҳақда Жаҳон соғлиқни сақлаш ташкилоти (ЖССТ) бош илмий ходими Сумия Сваминатан маълум қилди, деб ёзади «РБК».

Сумия Сваминатан.

Фото: Reuters

«Ҳаттоки вакциналар касалликка тез чалинувчан одамларни ҳимоя қилишни бошлаганида ҳам, биз 2021 йилда оммавий иммунитетнинг қандайдир даражасига ета олмаймиз», — деди Сваминатан.

Унинг сўзларига кўра, агар жамоавий иммунитет бир нечта мамлакатларда пайдо бўлса, «бу бутун дунёдаги одамларни ҳимоя қилмайди».

Айни вақтда Сваминатан вакциналарни ишлаб чиқишда «ҳайратланарли натижа»га эришилганини маълум қилди. «Бир йилгина аввал ҳеч ким бизда коронавирусга қарши бир эмас, бирйўла бир нечта вакцина бўлишини тасаввур ҳам қила олмасди. Ва улар барча мамлакатларга етиб боради, аммо биз сабрли бўлишимиз керак», — деди эксперт.

Citi Research таҳлилчилари прогнозига кўра, коронавирусга нисбатан жамоавий иммунитет дунёда 2021 йил охирига келибгина шаклланишни бошлайди. Улар шундай хулосага келдики, ривожланган бозорлар вакциналарга олдиндан буюртмаларнинг 85 фоизини таъминлаган. АҚШ, Буюк Британия, Япония, Канада, Австралия ва Евроиттифоқ мамлакатлари ўз аҳолисининг эҳтиёжларидан ортиқроқ миқдорда дори буюртма қилган. Бу шуни билдирадики, у ерда вакциналарнинг оммавий тарқалиши иккинчи ёки учинчи чоракда бошланади, жамоавий иммунитет эса 2021 йилнинг сўнгги уч ойида шаклланиши мумкин. Иқтисодиёти ривожланаётган мамлакатларда эса вакцинация 2022 йилда ёки ундан кейинроқ бошланиши мумкин, деб прогноз қилади Citi Research.

Аввалроқ АҚШ бош инфекционисти Энтони Фаучи коронавирус инфекциясига нисбатан жамоавий иммунитет ҳосил бўлиши учун аҳолининг 85 фоизгача бўлган қисми эмланиши кераклигини маълум қилган эди.

Мавзуга доир: