Ражаб Тоййиб Эрдўғон Туркияда COVID-19’га қарши вакцинация кампанияси 14 ёки 15 январь кунлари бошланишини маълум қилди. Бу ҳақда Anadolu’га таяниб «РБК» хабар бермоқда.
Давлат раҳбари мамлакатга Хитой вакцинасини келтириш бошланганини айтган. Анқара, шунингдек, Россия ва Буюк Британия вакциналарини ҳам кузатаётганини билдирган. Президент касалланиш даражаси пасайиши билан ҳукумат инфекцияга қарши жорий этилган чекловларни ҳам аста-секин юмшатишни бошлашини таъкидлаган.
Туркия соғлиқни сақлаш вазири Фахреттин Кўжа эпидемия устидан тўлиқ ғалаба қозонилмагунча бўшашмасликка чақирган. «Огоҳлик — бизнинг энг катта қуролимиз. Эмлаш дастури муваффақиятли якунлангунига қадар чеклов ва чораларга тўлиқ риоя қилиш жуда муҳимдир», — деб ёзган у Twitter’да.
Сўнгги суткада Туркияда 10,2 минг кишида COVID-19 аниқланган, 174 киши вирус оқибатида вафот этган. Мамлакатда пандемия бошидан буён 2,3 кишида вирус қайд этилган, уларнинг 22,9 минг нафари вафот этган. Январь ойи бошларида Туркияда 15 кишида коронавируснинг «британча» штамми тасдиқланди.
Декабрь ойи бошларида Кўжа Туркия ҳозирча коронавирусга қарши вакцинани сотиб олмаслигини, чунки у тегишли лаборатория номаларига жавоб бермаслигини ва Туркияда лицензия ололмаслигини маълум қилганди. «Шу сабабли у бизнинг қизиқишимиз доирасидан чиқди», — деган эди вазир.Бироқ кейинроқ вазир туркиялик мутахассислар Россия препарати устида тадқиқот олиб боришга киришганини маълум қилди.
Кейинроқ вакцинани ишлаб чиқишда иштирок этган Россия тўғридан-тўғри инвестициялар жамғармаси (РТИЖ) матбуот хизмати ҳам Анқаранинг ушбу вакцинани сотиб олишдан бош тортгани ҳақидаги хабарларни сохта деб атаб, бу чет элда туриб вакцинага қарши олиб борилаётган ахборот кампаниясига мисол бўла олишини айтган.
Россия президентининг матбуот котиби Дмитрий Песковнинг сўзларига кўра, клиник синовлар вакцинанинг ишончлилиги ва самарадорлигини тасдиқлаган. Песков «Спутник V» «пандемияга қарши курашда ҳали жуда муҳим рол» ўйнашига ишонч билдирди.
Изоҳ (0)