Шварценеггер болалигида «нацистлар томонидан алданган» маст отаси уни дўппослагани ҳақида гапириб берди. Энди Трамп ўз тарафдорларини худди шундай алдаётганини айтди

АҚШнинг Калифорния штати собиқ губернатори, Республикачилар партияси аъзоси, актёр Арнольд Шварценеггер видеомурожаат қолдириб, унда сайловлардаги мағлубиятини тан олишдан бош тортаётган президент Дональд Трампнинг хатти-ҳаракатларини танқид қилди, деб ёзади Meduza.

Нутқи бошида Шварценеггер Австрияда Иккинчи жаҳон уруши тугаганидан кейин бор-йўғи икки йил ўтиб дунёга келганини эслатди ва болалигида атрофидаги кишилар «тарихдаги энг ёвуз режимга алоқадорлиги учун айбдорлик ҳисси билан алкоголь ёрдамида курашишга уринган синган одамлар» бўлганини қайд этди.

«Мен бу ҳақда ҳеч қачон омма олдида гапирмаганман, чунки булар оғриқли хотиралар. Отам ҳафтасига бир-икки марта уйга маст ҳолатда келарди — бақирарди ва онам иккаламизни урарди. Лекин мен бунинг учун ҳамма масъулиятни фақат унинг бўйнига қўймайман, чунки қўшнимиз ҳам, унинг қўшниси ҳам ва ҳоказо — ўз оиласига шундай муносабатда бўлар эди», — деди актёр.

Шварценеггернинг сўзларига кўра, бундай хатти-ҳаракат руҳий жароҳатлар билан изоҳланади. Жароҳатларнинг ўзи эса бу одамлар «ёлғон ва тоқат қила олмаслик билан бошланган» нацистлар режими даврида нималарни кўргани ва нималар қилгани ҳақидаги хотиралардан келиб чиққан.

Энди худди шундай ёлғон ёрдамида ҳалол сайловлар натижаларини тан олишдан бош тортаётган Дональд Трамп ўз тарафдорларини йиғмоқда: «У ёлғон ёрдамида одамларни эргаштириб, тўнтариш амалга оширишга уринди. Менинг отам ва унинг қўшниларини ҳам ёлғон ёрдамида нотўғри йўлга бошлашган эди ва мен бундай ёлғон қаерга олиб боришини биламан», — деди актёр.

My message to my fellow Americans and friends around the world following this week's attack on the Capitol. pic.twitter.com/blOy35LWJ5

— Arnold (@Schwarzenegger) January 10, 2021

Шварценеггер Трампни «тарихдаги энг ёмон президент» деб атади ва у яқинда «худди ўринсиз твитдек» унитилишини, АҚШнинг ўзи эса худди тоблангандан кейин янада мустаҳкамланадиган рицар қиличи каби жорий инқироздан янада кучлироқ бўлиб чиқади. Шу ҳақда гапираётиб, актёр «Варвар Конан» қиличини чиқариб, камерага кўрсатди.

Шварценеггернинг фикрича, сиёсий зиддиятларга қарамасдан, АҚШнинг барча аҳолиси демократия ва унинг тамойилларини биринчи ўринга қўяди. Шу сабабли улар ҳозир сайланган президент Жо Байденни қўллаб-қувватлаши керак.

Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.

Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда беш киши ҳалок бўлди.

Кейинроқ, 7 январь куни АҚШ Конгресси мажлисини давом эттириб, Жо Байденнинг АҚШнинг 46-президенти этиб сайланганини тасдиқлади ва унинг инаугурациясини 20 январга белгилади. Трамп овоз бериш якунларидан ҳамон норози бўлса-да, ваколатларни сайланган президентга топширишга тайёрлигини эълон қилди.