AQSh vitse-prezidenti Mayk Pens mamlakatning amaldagi prezidenti Donald Tramp “yanada beqarorlashgan” taqdirda, unga nisbatan Konstitutsiyaga kiritilgan 25-tuzatish qo‘llanilishi mumkinligini istisno qilmadi. Bu haqda CNN telekanali vitse-prezidentga yaqin manbaga tayanib xabar berdi, deb yozadi “RBK”.
Nashr hamsuhbatining aytishicha, voqealarning bunday tus olishi shu haftadayoq yuz berishi mumkin. Shuningdek, telekanal manbasi ma’lum qilishicha, Pensning jamoasida 25-tuzatishga yoki hatto impichment jarayoniga asoslanish xavfga olib kelishi borasida qandaydir xavotir bor, chunki Tramp mamlakatni xavf ostiga qo‘yib, bemulohaza xatti-harakatlarni amalga oshirishi mumkin.
Avvalroq CNBC telekanali o‘z manbalariga tayanib, AQSh davlat kotibi Mayk Pompeo va moliya vaziri Stiven Mnuchin Trampga nisbatan 25-tuzatishni qo‘llash imkoniyatini muhokama qilgani haqida xabar bergan edi.
Masala muhokamasi norasmiy xususiyatga ega bo‘lgan. O‘shanda munozara ishtirokchilari Trampni chetlatish jarayoni “haddan tashqari ko‘p vaqt oladi” degan xulosaga kelgan. Bundan tashqari, tomonlar senatda tasdiqlanmagan va “vazifasini bajaruvchi” maqomi bilan ishlayotgan idoralar rahbarlari tomonidan tuzatishlarning qo‘llanilishi imkoniyatini tushunarsiz deb atadi. Trampning chetlatilishi uning tarafdorlari orasida keskinlikni yanada kuchaytirishi va amaldagi prezidentni o‘ta o‘nglar qahramoniga aylantirishi, bu bilan esa qisqa muddatli istiqbolda foyda o‘rniga, uzoq muddatli istiqbolda zarar olib kelishi haqidagi taxminlar ham yana bir xavf deb baholandi.
Bungacha Trampning iste’fosini yoqlab AQSh Demokratik partiyasi vakillari, xususan, vakillar palatasi spikeri Nensi Pelosi va senatdagi demokratlar yetakchisi Chak Shumer, shuningdek, vakillar palatasining sud ishlari qo‘mitasi rahbari Jerri Nadler chiqish qilgan edi.
AQSh Konstitutsiyasiga muvofiq, 25-tuzatish vitse-prezident va prezident ma’muriyatining katta qismi amaldagi davlat rahbarining layoqatsizligini tasdiqlagan taqdirda, hokimiyatning avtomatik ravishda vitse-prezidentga topshirilishini ko‘zda tutadi.
Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.
Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘ldi.
Keyinroq, 7-yanvar kuni AQSh Kongressi majlisini davom ettirib, Jo Baydenning AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi. Tramp ovoz berish yakunlaridan hamon norozi bo‘lsa-da, vakolatlarni saylangan prezidentga topshirishga tayyorligini e’lon qildi.
Izoh (0)