AQShning amaldagi vitse-prezidenti Mayk Pens saylangan prezident Jo Bayden va uning vitse-prezidenti Kamala Harrisning inauguratsiyasida qatnashadi. Bu haqda Politico nashri uchta manbaga asoslanib xabar bermoqda. Shuningdek, CNN, Reuters va NBC manbalari buni tasdiqlagan.
Politico nashri suhbatdoshlarining ta’kidlashicha, Pens shu tariqa hokimiyatni tinch yo‘l bilan topshirish an’anasiga sodiqligini namoyish etmoqchi.
Manbalarning qo‘shimcha qilishicha, Pensning bu qarorga kelishiga amaldagi prezident Donald Tramp tomonidan bo‘lgan tanqidlar ham sabab bo‘lgan. Tramp vitse-prezidentni 6-yanvar kuni Kongressda prezident saylovi natijalarini tasdiqlash jarayonini to‘xtatib qo‘yishdan bosh tortganini qoralagan edi (oqibatda jarayon Kapitoliy shturmi vaqtida to‘xtab qolgan edi).
NBC manbalarining ta’kidlashicha, Kapitoliy shturmi vaqtida Tramp bino ostidagi bunkerga yashirinishga majbur bo‘lgan Pens va uning oilasiga qo‘ng‘iroq qilib, xabar olmagan. Bundan tashqari, u Pensni osishga chaqirgan shturmning ayrim ishtirokchilarini ham qoralamagan.
Jo Bayden va Kamala Harrisning inauguratsiya marosimi 20-yanvar kuni bo‘lib o‘tadi. Tramp marosimda ishtirok etmasligini bir necha kun avval ma’lum qilgan edi.
Kapitoliyga uyushtirilgan bosqindan so‘ng Demokratik partiya vakili bo‘lgan bir qator siyosatchilar Konstitutsiyaga kiritilgan 25-tuzatishga asosan Trampni hokimiyatdan chetlatishni talab qildi — ushbu tuzatishga ko‘ra, prezident o‘z majburiyatlarini bajara olmay qolsa, vitse-prezident bilan almashtiriladi.
The New York Times’ning yozishicha, Kapitoliy shturmi atrofidagi voqealar sabab Tramp bilan munosabatlari sovuqlashganiga qaramay, Pens 25-tuzatishni qo‘llash g‘oyasini ma’qullamayapti. Biroq keyinroq CNN manbasi, agar Trampning “xulqi yanada taxmin qilib bo‘lmas darajaga yetsa”, u holda Pens 25-tuzatishdan foydalanishni o‘ylab ko‘rayotganini ma’lum qildi.
Izoh (0)