Donald Tramp yordamchilari bilan prezidentlik muddati tugaguncha o‘zini afv etish imkoniyatini muhokama qildi, deb yozadi The New York Times manbalariga asoslanib.
Nashr manbalarining so‘zlariga ko‘ra, Tramp noyabr oyidagi saylovlardan so‘ng, bir necha bor yordamchilariga o‘zini afv etish imkoniyatini ko‘rib chiqayotganini aytgan, ularning bu boradagi fikri bilan qiziqib, bunday qarorning mumkin bo‘lgan oqibatlari haqida so‘ragan.
Ta’kidlanishicha, AQSh tarixida biror-bir prezident o‘zini o‘zi hech qachon afv etmagan. Huquqshunoslar Tramp bunday qadamni tashlashga qaror qilsa, sud uning kechirilishini qonuniy deb tan oladimi yoki yo‘qmi degan savolda ikki guruhga ajralgan.
Shuningdek, nashrning yozishicha, Tramp o‘zi bilan birga oila a’zolari, yaqinlari, shu bilan birga, maslahatchilari va ma’muriyatidagi mansabdorlarni afv etish bo‘yicha qarorni muhokama qilgan. Tramp yangi prezident hokimiyatga kelganidan keyin ularga qarshi jinoiy ish qo‘zg‘atilishi mumkinligidan qo‘rqadi.
Tramp bilan ishlayotganlarning aksariyati bunga qarshi. Chunki afv etish to‘g‘risidagi qarorni qo‘llasalar, bu ular qilmagan jinoyatlar uchun aybni tan olish, deb talqin qilinishi mumkin.
Ma’lumot uchun, prezidentning kechirimi faqat federal darajada amal qiladi va shtat darajasida ta’qib qilinishdan himoya qilmaydi.
Dekabr oyi oxirida Donald Tramp boshqalar qatorida yolg‘on guvohlik berish va noqonuniy lobbichilikda ayblanib sudlangan o‘zining saylovoldi shtabining sobiq rahbari Pol Manafortni hamda soliq jinoyati uchun sudlangan va AQSh prezident saylovida Rossiyaning aralashuvi ishida ayblanuvchilarni hisoblangan kuyovining otasi Charlz Kushnerni afv etdi.
Eslatib o‘tamiz, 6-yanvar kuni Trampning tarafdorlari AQSh Kongressi saylov natijalarini tasdiqlab, Jo Baydenning g‘alabasini rasman tasdiqlashi kerak bo‘lgan Kapitoliy binosini shiddatli hujum bilan egallab oldi. Saylovchilar hay’ati a’zolarining ovozlarini hisoblash jarayoni to‘xtatilib, 7-yanvar kuni ertalab davom ettirildi. Tartibsizliklar oqibatida besh kishi halok bo‘ldi, o‘nlab politsiyachilar yaralandi.
Vaziyat tinchlangach, Kongressdagi Demokratik partiya vakillari va ba’zi respublikachilar amaldagi vitse-prezident Mayk Pensni Konstitutsiyaga kiritilgan 25-tuzatishga muvofiq, Donald Trampni hokimiyatdan chetlatishga da’vat etdi. The New York Times ma’lumotlariga ko‘ra, Pens ushbu choraga qarshi chiqadi. Uni Tramp ma’muriyatidagi bir qator mansabdorlar qo‘llab-quvvatlaydi.
Vakillar palatasi spikeri Nensi Pelosi agar Mayk Pens va uning ma’muriyati 25-tuzatishni amalda qo‘llamasa, unda demokratlar yana bir impichment jarayonini boshlashga tayyorligini ma’lum qildi.
Izoh (0)