Сирдарё вилоятида ис газидан заҳарланиш оқибатида 33 ёшли эркак ва унинг 26 ёшли турмуш ўртоғи вафот этди. Уларнинг 2 ёшли қизи реанимацияга ётқизилди. Бу ҳақда вилоят прокуратурасига таяниб, ЎзА хабар берди.
Маълум қилинишича, Оқолтин тумани ички ишлар бўлими навбатчилик қисмининг 8 январь 2021 йил соат 13:45 да берган хабарига кўра, Оқолтин тумани «Кўркам диёр» МФЙ Маржонбулоқ кўчасида яшовчи 1987 йилда туғилган фуқаро Т.С., турмуш ўртоғи 1994 йилда туғилган И.С. ва вояга етмаган фарзанди 2019 йилда туғилган Э.Р. яшаш хонадонида заҳарланган.
Заҳарланиш оқибатида Т.С. воқеа жойида вафот этган.
Шунингдек, турмуш ўртоғи И.С. ва вояга етмаган фарзанди Э.Р. Оқолтин тумани тиббиёт бирлашмасининг жонлантириш бўлимига ётқизилган. Кўрсатилган тиббий ёрдамларга қарамасдан, 26 ёшли И.С. шифохонада вафот этган.
Мазкур ҳолат юзасидан Оқолтин тумани прокуратураси томонидан терговга қадар текширув ўтказилмоқда.
Аввалроқ Хоразмда 31 ёшли аёл ва унинг 10 ёшли қизи, Бухоронинг Когон шаҳрида 3 нафар фуқаро ҳамда Қорақалпоғистонда бир оиланинг 4 нафар аъзоси ва 2 нафар меҳмон ис газидан заҳарланиб вафот этгани ҳақида хабар берилганди.
Изоҳ (0)