Япония бош вазири Ёсихидэ Суга коронавирус билан касалланиш ҳолати кўпайгани сабабли Токио ва унинг атрофида фавқулодда ҳолат жорий этди, дея хабар бермоқда «Интерфакс».
Kyodo News хабарига кўра, сўнгги 24 соат ичида пойтахтда 2447 та янги COVID-19 касаллиги аниқланган, бу кўрсаткич олдинги антирекорддан 800 тага кўпроқ.
Фавқулодда ҳолат 8 январдан 7 февралгача давом этади.
Айни пайтда Токио аҳолисидан иложи борича уйда ўтириш ва товарларга интернет орқали буюртма бериш сўралади. Ресторан ва барларда фақат 20:00 гача ишлаш мумкин бўлади, уларга спиртли ичимликларни сотишга 19:00 гача рухсат берилди.
Дўконлар, кўнгилочар ва спорт иншоотларининг иш вақти ҳам қисқартирилади. Компанияларга ходимларни масофавий ишлашга имкон яратиш ёки корхоналарда сменали ишни жорий этиш тавсия этилади. 5000 дан ортиқ одам иштирок этадиган оммавий тадбирлар тақиқланади.
Мактаблар, баҳорги локдаундан фарқли ўлароқ, ўз фаолиятини давом эттиради. Университет имтиҳонлари ҳали бекор қилинмайди.
Чекловларни бузганлик учун жазо йўқ, лекин қоидабузарлар очиқчасига омма олдида сазойи қилинади. Ҳукумат барча талабларнинг бажарган умумий овқатланиш муассасаларига кунига 40 минг иенадан (390 АҚШ доллари) 60 минг иенагача компенсация пули тўлашни ваъда қилди.
Шунингдек, чекловлар Токиода кунлик касалланиш даражаси 500 тага тушганда бекор қилиниши мумкин.
Япония бўйлаб сўнгги сутка давомида 6004 та касалланиш ҳолати қайд этилди, бу пандемия бошланганидан бери рекорд кўрсаткич ҳисобланади. Kyodo нашри мамлакатда COVID-19 эпидемиясининг учинчи тўлқини давом этмоқда, деб ҳисоблайди.
Аввалроқ Қозоғистон ҳамда Германияда коронавирус туфайли чекловлар кучайтирилгани, Ливан ва Шотландияда эса яна карантин жорий этилгани ҳақида хабар берилганди.
Изоҳ (0)