ЮНИСЕФ ташкилоти «Юксалиш» умуммиллий ҳаракати ва Ёшлар иттифоқи ҳамкорлигида тайёрланган «Ўзбекистон ёшлари: чақириқлар ва истиқболлар» мавзусидаги ҳисоботини эълон қилди.
Таъкидланишича, республика бўйича 14—30 ёш оралиғидаги 4458 нафар респондент орасида ўтказилган сўров ҳисобот хулосалари учун асос бўлиб хизмат қилган.
«Ўзбекистонда болалар ва 30 ёшгача бўлганлар аҳолининг 60 фоизини ташкил қилади. 15—20 йилдан кейин улар мамлакат тарихида энг катта ҳажмдаги ишчи кучини ҳосил қилади. Шу боис болалар ва ёшлар масалалари Ўзбекистон учун устувор аҳамиятга эга», — дейилади ҳисоботда.
Ўтказилган сўров хулосаларига кўра, Ўзбекистон бўйлаб таҳсил олувчилар умумий ҳисобда таълим инфратузилмасидан (ўқув материаллари, таълим муассасаларидаги муҳит) қониқишини билдирган бўлса-да, қишлоқ ҳудудларида шаҳарга нисбатан аҳвол ёмонроқлигини айтган.
Шунингдек, талабалар ўқув тизими кўпроқ мотивация уйғота олувчи, амалиётга йўналтирилган бўлишини, тил кўникмалари иш саводхонлигини оширишни хоҳлашларини айтган.
«Кўплаб талабаларда таълим билан боғлиқ харажатлар стресс ва чорасизлик ҳиссини чақиради. Бу харажатлар қаторида ёшлар репетиторлик машғулотлари учун тўлов, пора бериш ҳолатлари, ОТМларда ўқиш тўловларининг юқорилигини кўрсатишган», — дея таъкидланади ҳисоботда.
Мамлакат ёшларининг компьютерни ўрганишга қизиқиши юқори бўлса-да (86,9 фоиз), компьютерда умуман ишлай олмайдиган ёшлар — асосан аёллар ва қишлоқ ҳудудида яшовчилар қатлами ҳам (37,8 фоиз) мавжуд.
«Ёшлар ислоҳ қилиниши зарур бўлган соҳалар қаторида сифатли таълим, касбий тайёргарлик, ёшлар орасидаги ишсизлик ва даромадлар пастлиги билан самарали кураш, эрта турмуш, ажримлар, катта ва ёш авлод ўртасидаги зиддият каби ижтимоий муаммоларни кўрсатади. Ёш авлоднинг аксарияти сиёсий янгиликларга қизиқиш кўрсатиб, ўз фикрини эркин ифодалай олишини билдирса-да, жуда камчилик ёшлар жамоат ва сиёсий ташкилотлар фаолиятида иштирок этади», — дейилади ҳисоботда.
Аввалроқ ЮНИСЕФ Ўзбекистонда имконияти чекланганлар билан боғлиқ қонунчилик халқаро талабларга тўла мос келмаслигини маълум қилганди. Шунингдек, Ўзбекистонда болалар ҳуқуқлари борасида эришилган ютуқлар пандемия сабаб йўққа чиқиши мумкинлиги ҳақида огоҳлантирганди.
Изоҳ (0)