Ички ишлар вазирлиги Йўл ҳаракати хавфсизлиги бош бошқармаси томонидан 2021 йилда йўл ҳаракати соҳасида интерактив хизматларни тақдим этиш бўйича Road24 ахборот тизими жорий этилиши режалаштирилган ва ҳозирда тест талқини ишга туширилиш арафасида. Бу ҳақда идора ахборот хизмати хабар берди.
Мобил дастур йўл ҳаракати қатнашчилари ва ЙПХ ходимлари учун қулайлик яратиш мақсадида ишлаб чиқилган бўлиб, унда ахборот киритиш, олиш ва тарқатиш имкониятлари мавжуд.
Дастур орқали йўл-транспорт ҳодисаси ўчоқлари, янги ўрнатилган йўл белгилари ҳақида хабардор қилиш, чорраҳаларда тирбандликларнинг олдини олиш, муаммоли вазиятларни камайтириш мақсадлари амалга оширилади.
Шунингдек, мобил дастурда йўл ҳаракати қоидаларини бузганлик учун жарималар ҳақида маълумотларни олиш ва уларни тўлаш имконияти мавжуд бўлади. Бунда ҳар бир фойдаланувчининг шахсий кабинети орқали транспорт воситасини жарима майдончасидан олиб чиқиш учун масофадан туриб, онлайн тарзда рухсатнома олиш мумкин.
Дастур орқали маълум муддатга ёпилган йўллар ҳақида статистик маълумотлар бериб борилади. Бундан тушқари, ҳайдовчи ёки пиёда томонидан аниқланган йўлда ҳаракатланиш билан боғлиқ муаммолар ушбу дастурга белгиланиб, бошқа ҳайдовчилар огоҳлантирилади.
«Кўзланган мақсадлардан яна бири — дастурда белгиланган камчилик ва муаммолар масъуллар томонидан тезкорлик билан бартараф этилишидир», — дейилади хабарда.
Аввалроқ Ўзбекистонда профилактика инспекторлари учун Хитойдан 690 долларлик планшетлар харид қилинаётгани тўғрисида хабар берилганди.
Изоҳ (0)