Президент администрацияси раҳбари Зайнилобиддин Низомиддинов давлат раҳбарининг кўрсатмаси билан 4 январь, душанба куни Вазирлар Маҳкамасида 2020 йил якунлари ва 2021 йил устувор вазифаларига бағишланган йиғилиш ўтказди. Бу ҳақда «Gazeta.uz» хабар бермоқда.
Тадбирда бош вазир ўринбосарлари, маслаҳатчилар, шунингдек, вазирликлар ва хўжалик юритувчи субъектлар раҳбарлари иштирок этган. Бош вазирнинг биринчи ўринбосари, ҳудудларни комплекс ривожлантириш, коммуникациялар, қурилиш ва уй-жой коммунал хўжалиги масалалари бўйича раҳбар Очилбой Раматовнинг ҳисоботи кўриб чиқилган.
Комплекс таркибига Уй-жой коммунал хизмат кўрсатиш вазирлиги, Қурилиш вазирлиги, Транспорт вазирлиги (унинг таркибига Автомобиль йўллари давлат қўмитаси киради), Экология ва атроф муҳитни муҳофаза қилиш давлат қўмитаси, Uzbekistan Airways, Uzbekistan Airports компаниялари, «Ўзбекистон темир йўллари», «Ўзсаноатқурилишматериаллари», «Тошшаҳартрансхизмат», «Ўзшаҳар қурилиш инвест» ва бошқалар киради.
«Gazeta.uz»нинг аниқлик киритишича, танқидий руҳда ўтган учрашув якунлари бўйича Президентга маълумот тақдим этилган. Шунга асосланиб, давлат раҳбари уй-жой коммунал хизмат кўрсатиш вазири Музаффар Солиевни ишда йўл қўйган камчиликлари, қайта-қайта огоҳлантиришларга қарамай тегишли хулоса чиқармагани учун эгаллаб турган лавозимидан озод қилиш тўғрисида қарор қабул қилди. Президент, шунингдек, Автомобиль йўллари давлат қўмитаси раҳбари Абдураҳмон Абдувалиевга ҳайфсан эълон қилди, қурилиш вазири Ботир Зокировга огоҳлантириш берди.
Абдураҳмон Абдувалиевга ишдаги камчиликларни олти ой ичида бартараф этиш топширилган. Акс ҳолда униниг эгаллаб турган лавозимига лойиқлиги масаласи кўриб чиқилади.
16 декабрь куни Президент Шавкат Мирзиёев қиш мавсумига тайёргарликда йўл қўйилган хатоларни танқидий таҳлил қилиш ҳамда озиқ-овқат хавфсизлигини таъминлаш масаласига бағишланган кенгайтирилган йиғилиш ўтказганди. Унда давлат раҳбари вазирлик ва тармоқ раҳбарларини, шу жумладан, Музаффар Солиевни танқид қилган, деб ёзмоқда йиғилишни кузатган «Gazeta.uz».
Нашрнинг ёзишича, Президент Уй-жой коммунал хизмат кўрсатиш вазирлигида қандай савол ва муаммолари борлигини сўраган. Музаффар Солиев Тошкент вилоятининг учта туманида иситиш билан боғлиқ муаммолар мавжудлиги, аммо улар бир ҳафта ичида бартараф этилишига ишонтирган. Шавкат Мирзиёев тайёргарлик йил бошиданоқ амалга оширилаётганига қарамай, нега иш ўз вақтида якунланмаганини сўраган.
«Биз қозонхонани таъмирладик, аммо унинг остидаги қувур чириган бўлиб чиқди... Қувурлар узоқ вақт давомида алмаштирилмаган... Маблағ ажратилди, тез кунларда муаммоларни ҳал қиламиз», — деб жавоб берган эндиликда собиқ вазир Музаффар Солиев.
Музаффар Солиев (1975 йилда туғилган) Уй-жой коммунал хизмат кўрсатиш вазирлигига 2017 йил 5 июлдан бери раҳбарлик қилган. Унга қадар мудофаа вазирининг фронт орти ва капитал қурилиш бўйича ўринбосари (2010—2015 йиллар), сўнгра мудофаа вазирининг шахсий таркиб билан ишлаш бўйича ўринбосари (2015—2017 йиллар) лавозимларида ишлаган.
«Kun.uz»нинг маълум қилишича, транспорт вазири ўринбосари Даврон Деҳқонов ҳам лавозимидан озод этилган.
Даврон Деҳқонов муқаддам Ўзбекистон автомобиль транспорти агентлигига раҳбарлик қилган, 2019 йил февралида ушбу агентлик негизида Транспорт вазирлиги ташкил этилгач, вазир ўринбосари лавозимида ишлаб келаётганди.
Изоҳ (0)