«Бунёдкор» клуби қанот ҳимоячиси Дилшод Аҳмадалиев фаолиятини ОКМКда давом эттиради. Бу ҳақда олмалиқликлар клуби матбуот хизмати маълум қилди.
Эркин агент мақомида «кончилар» сафига қўшилган Дилшод жамоа билан 1 йиллик шартнома имзолади.
Дилшод Аҳмадалиев 1994 йили Наманган вилоятининг Тўрақўрғон туманида таваллуд топган ва 2015 йили «Обод» сафида ҳаракат қилган. 2016 йилдан эътиборан эса «Бунёдкор» тўп суриб келади. Ҳимоячи 2016—2020 йиллар мобайнида «Бунёдкор» сафида жами 128 ўйинда майдонга тушган ва рақиблар дарвозасини 5 маротаба ишғол қилган. Дилшод Аҳмадалиев Ўзбекистон чемпионатида 101 ўйин, Осиё Чемпионлар Лигасида 9 учрашув ва кубок баҳсларида 18 беллашув ўтказган.
Эслатиб ўтамиз, 2018 йилда бир гуруҳ футболчилар қаторида Дилшод ҳам ёши кичрайтириб кўрсатилгани маълум бўлган. 2012 йилги ўсмирлар ўртасидаги Осиё Чемпионатида Ўзбекистон терма жамоасида Зокир Аҳмадалиев номи билан қатнашган футболчининг асл исми Дилшод экани ва у 1996 йилда эмас 1994 йилда туғилгани маълум бўлганди. Бунинг натижасида Аҳмадалиев ЎФА томонидан 2018 йилнинг январь ойида бутун умрга футболдан четлатилган, бироқ ўша йилнинг ёзида афв этилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)