Қашқадарё вилоят Соғлиқни сақлаш бошқармаси тез ёрдам ходимларига ваъда қилинган рағбат пули тўлаб берилишини маълум қилди

Қашқадарё вилоятида коронавирусга қарши курашган тез тиббий ёрдам бўлими махсус бригадаларига ваъда қилинган рағбат пули тўлаб берилмаётгани ҳақида хабар берилганди. Вилоят Соғлиқни сақлаш бошқармаси ахборот хизмати мазкур мақолага муносабат билдириб, ваъда қилинган рағбат пуллари тез орада тўлаб берилишини маълум қилди.

«Қарши шаҳар тез тиббий ёрдам бўлими махсус бригадаларига Республика махсус комиссиясининг 2020 йил 30 апрелдаги 20-сонли йиғилиш баёни билан тасдиқланган вақтинчалик низом, Вазирлар Маҳкамасининг 2020 йил 20 июлдаги ‘Коронавирус инфекциясига қарши кураш даврида аҳолини тез тиббий ёрдам хизмати билан кенг қамраб олиш чора-тадбирлари тўғрисида’ги 446-сонли, 2020 йил 30 июлдаги ‘Коронавирус инфекциясига қарши кураш, аҳолининг санитария-эпидемиологик осойишталиги ва саломатлигини сақлашга жалб қилинган тез тиббий ёрдам ходимларини қўшимча моддий рағбатлантириш тўғрисида’ги 458-сонли ҳамда 2020 йил 24 сентябрдаги ‘Ўзбекистон Республикасида коронавирус инфекцияси тарқалишининг олдини олиш тадбирларига ажратилаётган маблағларнинг самарадорлигини таъминлашга оид чора-тадбирлар тўғрисида’ги 583-сонли қарорлари асосида тегишли тартибда қўшимча рағбатлантириш тўловлари тўланиши белгиланган.

Бу борада Республика шошилинч тиббий ёрдам илмий маркази Қашқадарё филиали директорининг тегишли буйруқлари қабул қилинган. Шундан 458-сонли қарорда белгиланган рағбат тўловлари, яъни республика бюджетидан ажратилган 100 миллиард сўм ҳамда таниқли тадбиркор, ватандошимиз Алишер Усмонов томонидан қўшимча равишда ҳомийлик хайрияси сифатида ажратилган 100 миллиард сўм ҳисобидан Қарши шаҳар тез тиббий ёрдам бўлимининг мазкур тадбирларга жалб қилинган ходимларига ҳам бир марталик моддий рағбатлантириш тўловлари ўз вақтида тўлаб берилган», — дейилади бошқарма муносабатида.

Бошқарма масъулларининг айтишича, бошқа йўналишлардаги рағбатлантириш тўловларига доир бирламчи ҳисоб-китоб ҳужжатлари ўз вақтида тақдим қилинмаганлиги сабабли тўловлар кечиккан. Айни пайтда мазкур ҳужжатларни тезкорлик билан тайёрлаб, молия идораларига тақдим этиш бўйича зарур чора-тадбирлар белгиланган.

Шунингдек, бу борада сусткашликка йўл қўйган мутасаддиларга тегишли тартибда чора кўрилган. Бироқ бошқарма мазкур ишда ким айбдор қилинганини ва айнан кимга чора кўрилганини очиқламаган. Дастлабки мақолада «Дарё» мухбири билан суҳбатлашган вилоят Соғлиқни сақлаш бошқармаси бош иқтисодчиси Шомурод Боймуродов бундай вазият келиб чиқишига Қарши шаҳар тез тиббий ёрдам станцияси раҳбарияти айбдор эканини, улар ўз вақтида рағбатлантирилиши лозим бўлган ходимлар рўйхатини тақдим этмаганини айтганди. Қарши шаҳар тез тиббий ёрдам станцияси бошлиғи Улаш Воҳидов эса «биздан энди рўйхат сўрашди», деганди.

Бошқарма ахборот хизматининг қўшимча қилишича, бўлим ҳайдовчиларининг автомашиналарга эҳтиёт қисмлари етишмаслиги борасидаги эътирозлари ҳам ўрганилган.

«Мутасаддиларга топшириқлар берилди. Вилоят ҳокимининг қарори асосида вилоят соғлиқни сақлаш бошқармаси махсус автокорхонасига 383 миллион сўмлик эҳтиёт қисмлари келтирилган. Айни пайтда мазкур эҳтиёт қисмларини тарқатиш жараёни давом этмоқда», — дейилади бошқарма ахборот хизматининг расмий жавобида.