The Washington Post газетаси Дональд Трамп ва Жоржия давлат котиби Бред Раффенспергер ўртасидаги суҳбат аудиосини эълон қилди. Унда АҚШнинг амалдаги президенти амалдорни штат сайловларидаги мағлубиятини бекор қилиш учун етарлича овоз «топишга» чақирган, деб ёзади TJournal.
Трамп суҳбат давомида Раффенспергерни уришган, «хушомад» қилган, ҳаракат қилишини «ўтиниб сўраган» ва ҳатто жиноий таъқиб қилиш билан мужмал таҳдид қилган. Президент Раффенспергер Фултон округида ноқонуний йўқ қилинган минглаб сайлов бюллетенларини топмаса (бунга бирор далил йўқ), давлат котиби ва офиснинг бош юрисконсулти Ратан Жермани жавобгарликка тортилишини тахмин қилган.
WP ушбу таҳдидни «мужмал» деб атаган. «Жоржия халқи ғазабда, мамлакатдаги инсонлар ғазабланмоқда. Билсангиз, қайтадан санаганингиз ҳақида айтишнинг ҳеч қандай ёмон томони йўқ», — деган у.
«Қаранг, мен қилмоқчи бўлган нарса фақат шу. Мен 11 780 та овозни топишни хоҳлайман, бу бизда мавжуд овоздан биттага кўп. Чунки биз штатда ютдик», — дейди Дональд Трамп.
Раффенспергер ва Жермани Трампнинг штатдаги ғалабаси борасидаги даъволарини рад этиб, у бузилган фитна назариясига таянаётганини тушунтирган. Уларнинг таъкидлашича, сайланган президент Жо Байденнинг ғалабаси адолатли ва аниқ бўлган, бироқ Трамп уларнинг барча далилларини рад этган.
Суҳбат давомида алоқада Трампнинг бир нечта иттифоқдоши, хусусан, Оқ уй администрацияси раҳбари Марк Медоуз ва консерватив юрист Клета Митчелл ҳам бўлган. Ушбу ёзув пайдо бўлганидан сўнг Митчелл Раффенспергернинг офиси «сўнгги икки ойда нотўғри бўлган кўплаб баёнотларни билдирганини» айтган. Унинг сўзларига кўра, сайловларда иштирок этган барча Жоржия бўйича маълумотлар тасдиқланишини талаб қилмоқда. Қолганлар вазиятга изоҳ беришни истамаган.
Маълумот учун, 2021 йил 20 январь куни сайланган давлат раҳбари демократ Жо Байден ўз лавозимига киришиши керак. Декабрь ўрталарида сайловчилар ҳайъати Трампнинг сайловдаги бош рақибини Американинг 46-президенти деб эълон қилди. Байден сайловчилар ҳайъати аъзоларининг 300 дан ортиқ овозини, амалдаги президент эса 230 дан зиёдроқ овозни қўлга киритди. Байденнинг инаугурацияси анъанага кўра Вашингтонда бўлиб ўтади.
Изоҳ (0)