Норвегияда коронавирусга чалиниш ҳолатлари сони ортиб бормоқда, шу боис мамлакат ҳукумати инфекцияга қарши кураш доирасида аввал жорий этилган чекловларни янада кучайтириш, хусусан, кафеларда алкоголь ичимликлар савдосини тақиқлаш ва хусусий тадбирларда қатнашувчилар сонини чеклаш ҳақида қарор қабул қилди. Бу ҳақда мамлакат бош вазири Эрна Сулберг маълум қилган.
Мамлакатнинг 40 та муниципалитетида касалланиш ҳолатлари ортиб бормоқда; аҳолининг байрамлардан сўнг ватанга қайтиши ва мамлакатда коронавируснинг янги штамми аниқланиши фонида, бу ҳолат расмийларнинг ҳақли хавотирига сабаб бўляпти, дея изоҳлаган бош вазир.
Маълум бўлишича, 4—18 ноябрь кунлари Норвегияда қуйидаги чекловлар амал қилади:
- кафелар ёпилмаса-да, унда алкоголь ичимлар савдоси тақиқланади (бунгача ярим тундан сўнг алкоголь сотиш тақиқланган эди);
- уйдан ташқаридаги хусусий тадбирларда, масалан, туғилган кун оқшомларида иштирокчилар сони беш кишидан ошмаслиги керак эди (бунгача бундай тадбирларда 20 киши қатнашиши мумкин эди). Ёпиқ иншоотлардаги очиқ тадбирларда иштирокчилар сони 10 кишидан ошмаслиги лозим. Агар иштирокчилар оралиқ масофани сақлаб ўтирса, у ҳолда кўпи билан 200 киши қатнашиши мумкин (бу қоида ўзгаришсиз қолган).
- дафн маросимларида ташрифчилар сони 50 кишидан ошмаслиги лозим (оралиқ масофа сақланмаса ҳам).
- университет, коллеж ва касб-ҳунар билим юртларидаги барча машғулотларни масофавий форматга ўтказиш;
- заруратсиз сафарга чиқмаслик;
- одамлар оралиқ масофани сақлай олиши учун савдо марказларида ташрифчилар сонини тартибга солиш;
- режалаштириб қўйилган барча дам олиш, спорт ва маданий тадбирларни бошқа санага қолдириш.
Жонс Ҳопкинс университети маълумотларига кўра, пандемия бошидан бери Норвегияда 50,5 мингта касалланиш ҳолати қайд этилган. Мамлакатда шу вақтгача коронавирусга чалинган 436 киши вафот этган.
Изоҳ (0)