Россияда январь ойининг илк ҳафталарида коронавирусга чалиниш ҳолатлари кўпайиши кутилмоқда. Бу ҳақда инфекционист ва «Лидер-Медицина» тиббиёт маркази бош шифокори Евгений Тимаков огоҳлантирди, деб ёзади «РБК».
Унинг «РИА Новости»га аниқлик киритишича, таътил чоғида одамлар бир-бири билан кўпроқ мулоқот қилади, бу эса касалланганлар сони ошишига олиб келади.
Шифокорнинг фикрича, Москвадаги вазият январь охирига келиб барқарорлашади. Бутун мамлакат даражасидаги барқарорлашув бир ойдан кейин, февраль охирига келиб юз беради, деб ҳисоблайди эксперт.
Унинг сўзларига кўра, айни пайтда касалланиш билан боғлиқ вазият кескин, аммо барқарор.
Яна бир инфекционист, тиббиёт фанлари доктори Николай Малишев ҳам шу фикрда. У таътилдан кейин Москвани COVID-19’га чалиниш ҳолатларининг кўпайиши кутмоқда, деган фикрда. «Одатда қишки таътилдан кейин ўсиш юз беради. Таътил чоғида эса касалланиш пасаяди. Бу кўп йиллар давомида респиратор касалликлар ва грипп устидан олиб борилган кузатувларга асосланади», — деди у «РИА Новости»га.
Вакцинация кампаниясининг кенгайиши билан пойтахтда вирусга қарши курашда муваффақиятларни кутиш мумкин, деди Малишев.
Аммо «РБК» суҳбатлашган экспертлар касалланиш ҳолатлари байрамлар фонида ўсишини қатъий прогноз қилмади, буни эпидемиологик жараёнларга таъсир қилиши мумкин бўлган кўп сонли омиллар билан изоҳлади.
«Умумий мулоҳазалардан келиб чиқиб айтадиган бўлсак, касалланиш байрамлардан кейин ўсади деб ҳисобламаслик учун ҳеч қандай асослар йўқ. Чунки мулоқотлар қанчалик кўп бўлса, касалланиш ўсишининг имкониятлари шунчалик кўп бўлади, — деб ҳисоблайди вирусолог, МДУ профессори, биология фанлари доктори Алексей Аграновский. — Иккинчи томондан, ҳаммаси бундай оддий эмас. Ахир кўп одамлар уйда ўтирибди ва бу мулоқотлар сони пасайган. Аммо одамлар барибир йиғилишган. Юз фоизлик эҳтимол билан байрамлардан кейин касалланиш кўрсаткичи кўтарилади деб айтиб бўлмайди». Эксперт у ўзгаришсиз қолиши мумкинлигини айтди, аммо пасаймаслигига ишонч билдирди.
Санкт-Петербург вице-губернатори Евгений Елин эса шаҳар ҳукумати Янги йил байрамлари тугаганидан кейин коронавирус инфекцияси тарқаилишининг учта янги тўлқинини кутаётганини айтди.
«Байрамлар тугаганидан кейин учта янги тўлқинни кутяпмиз: кўрамиз, Янги йилдан кейин, Рождестводан кейин ва одамлар таътилдан қайтгандан кейин нима бўларкан?», — деди у.
Елиннинг сўзларига кўра, «байрамлар эффекти» туфайли, Петербургда коронавирусга чалинган одамлар 30 фоизга камроқ касалхонага ёта бошлади, чунки бу кунларда одамлар уйда даволанишни афзал кўради.
Изоҳ (0)