АҚШда пандемия тўловларини 2 минг долларгача ошириш рад этилганидан кейин сиёсатчиларнинг уйларига ҳужум қилишди

2 январь куни АҚШнинг Кентукки штати Луисвилл шаҳрида вандаллар Конгресс сенатидаги кўпчилик етакчиси, республикачи Митч Макконнеллнинг уйига ҳужум қилди, деб хабар бермоқда Meduza.

Уйнинг кириш эшигига бўёқ билан «Менинг пулларим қани?» деб, деразага эса «Митч камбағалларни ўлдирмоқда» деб ёзиб кетишди.

Mitch McConnell’s Louisville home vandalized after blocking $2000 stimulus checks.

More: https://t.co/6DiCDKea8U pic.twitter.com/KVqZcPwS9N

— Complex (@Complex) January 2, 2021

Худди шундай ҳолат шу куниёқ Калифорнияда ҳам юз берди — вандаллар, ОАВлар хабарига кўра, Конгресс вакиллар палатаси спикери, демократ Нэнси Пелосининг Сан-Францискодаги уйига ҳужум қилди. Гараж эшигига «Ижарани бекор қил» ва «Биз ҳамма нарсани хоҳлаймиз» деб ёзиб, тротуарда сунъий қонга беланган чўчқа калласини қолдиришди.

Nancy Pelosi's home vandalized with graffiti, pig head: reports https://t.co/LfihkuCHId pic.twitter.com/g9g5mVyoqK

— New York Post (@nypost) January 2, 2021

Кентукки губернатори Энди Бэшер Макконнеллнинг уйидаги вандализмни «номақбул» деб атади. «Биринчи тузатиш бизнинг сўз эркинлигимизни ҳимоя қилса-да, ҳар қандай сабаб асосидаги вандализм ҳам ножўя ва номақбулдир», — деб ёзди у Twitter’да.

Ҳодисани изоҳлар экан, Митч Макконнелл «жамиятимизда вандализмга ва қўрқитиш сиёсатига ўрин йўқ» деб айтди. Нэнси Пелоси эса буни изоҳлаганича йўқ.

Эслатиб ўтамиз, 28 декабрь куни АҚШ Конгрессининг Вакиллар палатаси пандемия шароитида америкаликларга тўланадиган тўғридан-тўғри тўловлар миқдорини 600 дан 2000 долларгача ошириш таклифини қўллаб-қувватлади. Республикачилар томонидан назорат қилинувчи сенат бу ташаббусни рад этди, аммо бунгача у АҚШнинг амалдаги президенти Дональд Трамп томонидан қўллаб-қувватланган эди.

Аввалроқ АҚШ Конгресси коронавирус тарқалиши фонида иқтисодиётни қўллаб-қувватлашга қаратилган 892 миллиард долларлик янги пакет лойиҳасини маъқуллаган эди. Пакет аксарият америкаликларга 600 доллар миқдорида тўловлар, шунингдек, ишсиз қолганларга ҳафталик 300 доллар миқдорида қўшимча тўловларни ўз ичига олган.

Эслатиб ўтамиз, март охирида АҚШ Конгресси Сенати COVID-19 коронавирус пандемияси шароитида АҚШ компаниялари, аҳолиси ва соғлиқни сақлаш тизимини иқтисодий қўллаб-қувватлаш чора-тадбирлари тўғрисидаги қонун лойиҳасини бир овоздан маъқуллаб, 2,2 триллион доллар миқдорида маблағ ажратган, ушбу молиялаштириш пакети мамлакат тарихидаги энг йириги бўлганди. Апрель ойида эса Конгресс иқтисодиётни қўллаб-қувватлашга яна 484 миллиард доллар ажратиш тўғрисидаги дастурни маъқуллаганди. Баҳорда тасдиқланган кўплаб чоралар муддати тез орада тугайди ва янги чора-тадбирлар пакети уларни узайтиришни назарда тутади.

Аввалроқ АҚШ Молия вазирлиги иқтисодиётни кучайтиришга 916 миллиард доллар ажратишни таклиф қилгани, мамлакатда шатдауннинг олдини олиш учун бир кунга бюджет қабул қилингани ҳақида хабар берилган эди.