Ўзбекистонда 2020 йилда етти нафар судья коронавирус инфекцияси асоратлари оқибатида вафот этган. Бу ҳақда Ўзбекистон Судьялар Олий кенгаши матбуот хизмати «Дарё»га маълум қилди.
Маълум қилишларича, ўтган йилда ваколати муддатидан илгари тугатилган ўзбекистонлик судьяларнинг тўрт бирини вафот этган судьялар ташкил этган. Улардан етти нафари коронавирус инфекцияси асоратлари оқибатида вафот этган.
Булар:
- Сероб Гулмуродович Исканов — Ғузор туманлараро иқтисодий судининг раиси;
- Хайриддин Асамиддинович Шермуҳамедов — жиноят ишлари бўйича Тошкент вилоят суди судьяси;
- Шавкатжон Тўлқинбоевич Шодмонов — жиноят ишлари бўйича Андижон вилоят суди судьяси;
- Бегдулла Жўлдасович Ауезимбетов — Чимбой туман маъмурий суди раиси;
- Муҳамметдин Исметуллаевич Ниетуллаев — жиноят ишлари бўйича Қораўзак туман суди раиси;
- Тимур Улуғбекович Эргашев — Тойлоқ туман маъмурий суди раиси;
- Адҳам Очилович Қодирқулов — жиноят ишлари бўйича Тошкент туман суди судьяси.
Маълумот учун, Ўзбекистон Олий суди матбуот хизмати 1 август куни судья Хайриддин Шермуҳамедов, 15 сентябрь куни судья Шавкатжон Шодмонов, 22 сентябрь куни судья Муҳамметдин Ниетуллаев, 28 сентябрь куни судья Бегдулла Ауезимбетов, 2 октябрь куни судья Тимур Эргашев, 15 октябрь куни судья Адҳам Қодирқулов вафот этганини маълум қилган, бироқ олти ҳолатда ҳам судьялар ўлимига айнан нима сабаб бўлганини очиқламаган эди.
Фақат икки ҳолатда бошқа манбалар томонидан бу судьяларнинг коронавирус оқибатида вафот этгани билдирилган. Хусусан, Хайриддин Шермуҳамедов вафоти арафасида коронавирусдан даволаниш жараёнида бўлгани Судьялар Олий кенгаши томонидан маълум қилинган бўлса, Шавкатжон Шодмоновнинг коронавирус оқибатида вафот этганини «Дарё»нинг расмий доиралардаги манбаси тасдиқлаган.
Шунингдек, судьялик қасамёди ва одоб-ахлоқ қоидаларини ҳамда одил судловни амалга оширишда қонун талабларини қўпол равишда бузган 12 нафар судья тизимдан четлатилган. «Улардан бири жиноий жавобгарликка тортилган», — дейилади Судьялар Олий кенгаши ахборотида.
Мавзуга доир:
- Жиноий ишлар бўйича Чиноз туман суди раиси ҳибсга олинди
- Қаршида судья 500 доллар пора билан қўлга тушди
- Тошкент вилоятида озодликни чеклаш жазосини ўтаётган шахснинг зиёфатида қатнашган судьялар жаримага тортилган ва лавозими пасайтирилган
- Урганч туманлараро суди судьяси пора билан қўлга тушди
- Тошкентда 5 мингга яқин сохта қарор чиқарган судьялар устидан қўзғатилган жиноят иши бўйича суд 11 декабрь куни бошланади
Изоҳ (0)