2020 йил давомида 780 мингдан зиёд мобил қурилмалар божхона расмийлаштирувидан ўтказилган. Бу ҳақда 4- январь куни Ўзбекистон Телекоммуникация тармоқларини бошқариш республика марказида ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Ўзбекистон Телекоммуникация тармоқларини бошқариш республика маркази директори Улуғбек Шокировнинг таъкидлашича, IMEI кодини рўйхатга олишдан тушган маблағлар учун махсус битта ҳисобрақам очилган. 2020 йилнинг декабригача мобил қурилмаларнинг IMEI кодини рўйхатдан ўтказишдан 240 миллиард сўм маблағ келиб тушган.
«Мобил қурилмаларнинг IMEI кодини рўйхатдан ўтказишга оид Низомнинг 43-бандида маблағлар қаерга сарфланиши тўғрисида тўлиқ ёзиб қўйилган. Ушбу маблағлар Республика телекоммуникация инфратузилмаси, шу жумладан, қишлоқ ва чекка аҳоли пунктлари, туристик ҳудудларнинг ривожланиш лойиҳаларига йўналтирилади. Бундан ташқари, Вазирлар Маҳкамасининг қарорига мувофиқ, давлат органларида амалга оширилаётган ахборот коммуникация технологияларини жорий этиш лойиҳаларини мақсадли молиялаштириш учун сарфланади. Агар молиялаштирадиган жойлар қолмаса, ортган маблағлар ахборот коммуникация технологияларини ривожлантириш жамғармаси ҳисобига ўтказилади. Шуни алоҳида таъкидлаш керакки, тизим орқали тушаётган маблағлар республикамизда IT-технологияларни ривожлантириш борасида олиб борилаётган ишларни молиялаштириш учун сарфланадиган пулларнинг бир фоизини ҳам ташкил қилмайди», — деди Улуғбек Шокиров.
Изоҳ (0)