Лондон суди WikiLeaks асосчиси Жулиан Ассанжни АҚШга топширишдан бош тортди, дея хабар қилмоқда Meduza.
Суднинг таъкидлашича, АҚШга экстрадиция қилиш ва кейинчалик бир кишилик камерада сақлаш клиник депрессия ҳамда ўз жонига қасд қилиш мумкинлиги ташхиси қўйилган Ассанжнинг ҳаётига хавф солиши мумкин.
Ассанж ҳибсдалигида АҚШ суд қарорига қарши аппеляция шикояти киритиш ниятида эканлигини эълон қилган. Уни гаров эвазига озод қилиш тўғрисида қарор эса апелляция аризаси кўриб чиқилаётган вақтда – 6 январь куни қабул қилинади.
Эслатиб ўтамиз, Ассанж 2019 йил апрелидан бери Лондонда ҳибсда сақланмоқда. Бунгача Ассанж унга сиёсий бошпана берган Эквадор элчихонасида етти йил яшади. Ўша пайтда Британия суди уни Швецияга экстрадиция қилиш тўғрисида илтимосномани кўриб чиқаётган эди: у ерда Ассанж бир аёлни зўрлашда айбланган.
Аммо WikiLeaks асосчиси аслида Швеция уни АҚШга топширмоқчи деб ишонган. Ассанж элчихонада яшаган вақтида Швециядаги айбловлар якунланган.
Ассанжни АҚШга топшириш бўйича тингловлар 2020 йил февраль ойида бошланган.
АҚШда Ассанж 175 йилга озодликдан маҳрум қилиниши мумкин. У махфий маълумотларни ноқонуний равишда олишда (17 пункт бўйича, ҳар бири учун 10 йилгача озодликдан маҳрум қилиш белгиланган), шунингдек, компьютерга хакерлик ҳужуми (5 йилгача қамоқ жазоси) бўйича айбланган.
Изоҳ (0)