Коронавируснинг янги штамми тарқалиши туфайли Буюк Британиядаги вазият анча ёмонлашиши мумкин. Бу ҳақда Лондондаги қиролича Мария университети эпидемиология катта ўқитувчиси Дипти Гурдасани айтиб ўтди, деб ёзади «РБК».
Унинг маълумотларига кўра, коронавируснинг янги генетик вариантининг тарқалиш коэффициенти аввалги SARS-CoV-2’дан кўра тахминан 1,74 марта юқорироқ. Бу кўрсаткич битта бемор якканланиш режимига ўтгунига қадар ўртача нечта одамга юқтиришга улгуришини кўрсатади.
Бундан ташқари, коронавируснинг «британча» штамми аввалгидан фарқли ўлароқ, болалар ва 19 ёшгача бўлган ўсмирлар учун анча юқумлироқ бўлиб чиқди, деди Гурдасани. Шу сабабли мутацияга учраган вирус каттароқ эҳтимол билан ушбу ёш гуруҳида симптомларни келтириб чиқариши мумкин, дея огоҳлантирди у. Эпидемиологнинг сўзларига кўра, болалар ва ўсмирлар орасидаги юқори даражали юқумлилиги туфайли коронавируснинг янги штамми катталарга ҳам тезроқ юқиши мумкин, бу эса касалликнинг тезкор тарқалишига ва ўлимлар сони ошишига олиб келади.
«Барча фактлар битта нарса ҳақида гапирмоқда — вируснинг бутун Буюк Британия бўйича тарқалишини чеклаш учун шошилинч ҳаракат қилишимиз керак. Бу штаммнинг тарқалишига йўл қўйиб бериш — вариант эмас. Биз мактабларни хавфсиз қилиб, вирус янада юқишининг олдини олмагунимизча, уларни ёпишимиз керак», — деди Гурдасани.
Аввалроқ олимлар коронавируснинг янги штамми болаларда кўпроқ учраётганини маълум қилган эди.
Эслатиб ўтамиз, Буюк Британияда сентябрь ойида коронавируснинг янги, юқумлироқ B.1.1.7 штамми аниқланди. Декабрь ўрталарига келиб, Лондондаги касалланиш ҳолатларининг учдан икки қисми вируснинг шу варианти билан боғлиқ бўлиб қолди. 20 декабрдан Британия ҳукумати янги штамм туфайли коронавирусга қарши чекловларни кучайтирди.
Бундан ташқари, Буюк Британия дунёда биринчи бўлиб COVID-19’га қарши AstraZeneca вакцинасидан фойдаланишга рухсат берди. Мамлакатда оммавий вакцинация 2020 йил 8 декабрда бошланган.
Изоҳ (0)